Ռուսաստանը ԴԱՀԿ նախկին պետ, Հայաստանում պաշտոնի չարաշահման գործով քրեական հետապնդման ենթարկված, միջազգային հետախուզման մեջ գտնվող Միհրան Պողոսյանին տվել է ժամանակավոր կեցության կարգավիճակ:
Երևանի ընդհանուր իրավասության դատարանը մերժել է քննիչի միջնորդությունը՝ Մարտի 1-ի գործով քննչական խմբի ղեկավար Վահագն Հարությունյանի նկատմամբ կալանավորումը՝ որպես խափանման միջոց կիրառելու մասին: Իսկ Վերաքննիչ դատարանում սկսվել է նախկին նախագահ Ռոբերտ Քոչարյանին անձեռնմխելիության հիմքով քրեական հետապնդումը չդադարեցնելու վերաբերյալ Առաջին ատյանի դատարանի որոշման դեմ բերված բողոքի քննությունը:
Համադրելով այս նորությունները՝ «Առաջին լրատվական»-ի հետ քննարկման ընթացքում իրենց դիտարկումները ներկայացրին «Քաղաքացու որոշում» կուսակցության նախագահ Գարեգին Միսակյանը, «Մերժիր Սերժին» նախաձեռնության անդամ Դավիթ Հովհաննիսյանը, «Իմ քայլը» խմբակցության պատգամավոր Արման Բոշյանը:
Ա. Բոշյանի խոսքով՝ այս գործընթացներն իշխանության համար անակնկալ չեն, և իրավիճակն ամբողջությամբ վերահսկողության ներքո է: «Մենք արձանագրեցինք, որ Հայաստանի դատական համակարգն առողջացման խնդիր ունի, վերափոխումների կարիք կա, այդ գործընթացն ընթանում է, մեկնարկել են վեթինգի, անցումային արդարադատության վերաբերյալ քննարկումները»,- նշեց պատգամավորը:
Դ. Հովհաննիսյանի դիտարկմամբ՝ վերոնշյալ գործընթացները բխում են ՀՀ դատական համակարգի, ըստ էության, բացակայությունից. «Դատական համակարգը եղել է ընդամենը նախկին կոռուպցիոն և ավտորիտար համակարգի մի բաղադրիչը: Ժողովուրդը վերացրել է այդ համակարգի բոլոր թևերը, այս թևը մնացել է: Դատավորների մեծամասնությունը հանացավոր կապերով կապված է նախկին իշխանության պարագլուխների հետ, և պատահական չէ նրանց այսպիսի որոշումները,- նշեց Դ. Հովհաննիսյանը,- իշխանությունը գիտակցում է, որ պետք է արագ գնալ արմատական լուծումների՝ դատական համակարգը ազատագրելու կրիմինալ ռեժիմի ազդեցությունից և բերելու օրինական դաշտ»:
Գարեգին Միսակյանի խոսքով՝ անցումային արդարադատությունը այն բանալին է, որը կարգի կբերի դատական համակարգը, և մեկ տարի սպասելը ժամանակի վատնում էր:
Մանրամասն՝ տեսանյութում:
