Վրացական GHN լրատվական գործակալության փոխանցմամբ՝ Վրաստանում ԵՄ ներկայացուցչության ղեկավար Ֆիլիպ Դիմիտրովը հայտարարել է, որ Վրաստանի իշխանությունները շատ կարևոր քայլեր են ձեռնարկել ընդդեմ կտտանքների և մարդու իրավունքների խախտման, և արդեն տեսանելի են դրական ազդանշանները.
«Մարդու իրավունքների պաշտպանությունը պետք է իրականացվի առանց որևէ պայմանի։ Դա եվրոպական չափորոշիչների հիմքն է և արժեքների ամենակարևոր մասը։ Բոլորը հասկանում են, որ աշխարհում ամեն ինչ չէ, որ կարգին է և առկա են մարդու իրավունքների խախտումներ։
Այս առումով Վրաստանում նկատվում են որոշակի դրական ազդանշաններ։ Կտտանքների կանխման կոմիտեի եզրակացության մեջ նշված է, որ այդ ուղղությամբ շատ արդյունավետ աշխատանք է կատարվել, և երկրում գործում է ռեալ մեխանիզմ։
Բանտերի մասին նոր օրենսգրքի ընդունումից հետո առաջընթաց գրանցվեց այդ ոլորտում, ինչը շատ կարևոր է։ Չնայած այդ ամենին, Վրաստանը դեռ շատ անելիքներ ունի մարդու իրավունքների պաշտպանության ոլորտում իրավիճակի բարելավման համար»։
Հիշեցնենք, որ օրեր առաջ էլ Դիմիտրովը հայտարարել էր, թե ԵՄ-ը շարունակում է մեծապես հետաքրքրվել Վրաստանում մարդու իրավունքների պաշտպանության խնդրով և ուշադիր հետևում է այդ ոլորտում գրանցվող զարգացումներին.
«ԵՄ-ն ակնկալում է, որ այդ ուղղությամբ առաջընթաց կգրանցվի։ ԵՄ-ի և Վրաստանի միջև երկխոսությունը երկկողմանի գործընթաց է, որը կողմերին հնարավորություն է ընձեռում ճանաչել ձեռք բերված հաջողությունները և առաջ քաշել խնդրահարույց հարցերը։
