Այսօր Կենտրոնական ընտրական հանձնաժողովի հերթական նիստում Ազգային ժողովի համամասնական ընտրակարգով Հայաստանի Հանրապետական կուսակցության ընտրական ցուցակից ընտրված և լիազորությունները վաղաժամկետ դադարած պատգամավոր Արման Սահակյանի մանդատը փոխանցվել է Հանրապետական կուսակցության ընտրական ցուցակի հերթական հաջորդ թեկնածու՝ Համլետ Զաքարյանին:
ԿԸՀ հերթական նիստում նաև քվեարկությանը մասնակցելու դժվարություններ ունեցող ընտրողների համար քվեարկությունը մատչելի դարձնելու նպատակով սահմանվել են լրացուցիչ հնարավորություններ, ինչպես նաև սահմանվել են տեղամասային ընտրական հանձնաժողովում անդամներ նշանակելու հայտի ձևը, կարգը, անհրաժեշտ փաստաթղթերի և տեղեկությունների ցանկը, տեղամասային ընտրական հանձնաժողովների նախագահների և քարտուղարների պաշտոնների բաշխումն ըստ ընտրական տեղամասերի:
Որոշում է ընդունվել դիտորդների, վստահված անձանց կողմից քվեաթերթիկների տպագրման, փոխադրման, պահպանման և հաշվարկման գործընթացներին հետևելու կարգը սահմանելու մասին: Ընդունվել են նաև մի շարք այլ որոշումներ:
Հիշեցնենք, որ Արման Սահակյանը վերջերս նշանակվել էր Հայաստանի կառավարությանն առընթեր պետական գույքի կառավարման վարչության պետ: