Քննարկումներ են ընթանում Արամի 23 հասցեում գտնվող «Հայաստանի փոքրիկ երգիչներ» ՀՈԱԿ-ին ավելի բարենպաստ պայմաններ տրամադրելու և Արամի 23 շենքի փլված պատի վերականգնման հարցով: Վարչապետի աշխատակազմի հետ տեղի է ունեցել հանդիպում-քննարկում, որին ներկա էին մշակույթի նախարարության և քաղաքապետարանի ներկայացուցիչներ, Տիգրան Հեքեքյանը, իրացնող կողմը, Հայաստանի գլխավոր ճարտարապետը: Պարոն Աղաջանյանը հայտարարեց, որ այսուհետ խնդիրը լուծելու պարտավորությունը վերցնում է իր վրա: Եղան հստակ հանձնարարություններ… Վերջապես հարցը վերջնական լուծում կստանա. «Հայաստանի փոքրիկ երգիչներ» ՀՈԱԿ-ը կտեղափոխվի ավելի բարենպաստ պայմաններում գործելու և ստեղծագործելու»,- «Առաջին լրատվական»- ի հետ զրույցում այս մասին հավաստիացրեց Երևանի փոխքաղաքապետ Տիգրան Վիրաբյանը:
Նրա խոսքով՝ Երևանի քաղաքապետարանն անում է ամեն ինչ, անհրաժեշտ տվյալներն անկաշկանդ տրամադրում է դատախազությանը. «Մենք էլ ենք հակված, որ այն մարդիկ, ովքեր ներգրավված են եղել փաստաթղթաշրջանառության մեջ և այդ շենքին հարակից տարածքում կառուցապատման թույլտվություն են տվել, որն ունեցավ նման հետևանքներ, պատժվեն օրենքի ամբողջ խստությամբ: Ներկայիս իշխանություններն անում են ամեն ինչ, որպեսզի կատարվի օբյեկտիվ քննություն»:
Տ. Վիրաբյանը նաև տեղեկացրեց, որ մի քանի օրից կբացվի կայք, և առցանց հնարավոր կլինի հետևել մանկապարտեզ ընդունվելու համար երեխաների հերթագրման գործընթացին. «Սա թափանցիկ աշխատելու լավագույն օրինակներից է»: Փոխքաղաքապետի խոսքով՝ չկա գույքագրում, թե որ մանկապարտեզն ինչ շենքային պայմաններ ունի. հանձնարարություն է տրվել վարչական շրջանների ղեկավարներին գույքագրում անել, գործընթացներ են սկսվել մանկապարտեզները բեռնաթափել այնտեղ գործող կոմերցիոն կազմակերպություններից:
Տ. Վիրաբյանի խոսքով՝ մի շարք համակարգային փոփոխություններ կկատարվեն, կլինի վերապատրաստումների, լավագույն մասնագետներ ընտրելու փուլ:
Մեր զրուցակիցը նաև ընդգծեց, որ մշակութային հաստատությունների տնօրեններ ընտրելիս կարևորում են զարգացման ծրագրերը. «Երբ որ հիմա ուսումնասիրում ենք ՀՈԱԿ-ների հաստիքակազմերը, մեղմ ասած, վիճակն անմխիթար է: 2019թ. պահանջին հարիր մասնագիտներ չկան»:
Մանրամասն՝ տեսանյութում:
