Մադրիդի Պրադո ազգային թանգարանը ձեռք է բերել իսպանացի նկարիչ Ֆրանսիսկո Գոյայի (1746-1828 թթ.) նամակը, որը նա գրել էր իր մտերիմ ընկերոջը՝ արագոնցի ունևոր կոմերսանտ Մարտին Սարատերին (1747-1803 թթ.): Այդ մասին հայտնել են թանգարանի վարչակազմում՝ տեղեկացնում է TASS-ը։
Նամակը թվագրված է 1790 թվականի նոյեմբերի 10-ով, երբ Գոյան Սարագոսա ուղևորությունից հետո վերադարձել էր Մադրիդ՝ տեսակցելու Սարատերի հետ: Նկարչի ուղերձը Պրադոյի վրա նստել է 85 հազար եվրո: Ինչպես ճշտել են թանգարանում, նամակը գրվել է աճապարանքով, քանի որ այդ պահին Գոյան հոգեբանական ծանր վիճակում էր իր որդու հիվանդության պատճառով: Թանգարանի փորձագետները կարծում են, որ ձեռք բերված «փաստաթուղթը կարևոր է Գոյայի՝ որպես արվեստի գործչի և մարդու ճանաչման համար»:
Պրադո ազգային թանգարանը պաշտոնապես բացվել է 1819 թվականին Ֆերդինանդ թագավորի (1784-1833 թթ.) կողմից: Ներկայում Պրադոն կերպարվեստի եվրոպական խոշորագույն թանգարաններից մեկն է: Այդ մշակութային կենտրոնի հավաքածուում, մասնավորապես, պահվում են Դիեգո Վելասկեսի (1599-1660 թթ.) և Էլ Գրեկոյի (1541-1614 թթ.) աշխատանքների հարուստ ժողովածուները: Սոֆյա թագուհու մադրիդյան Արվեստների կենտրոնի հետ միասին Պրադոն հանդիսանում է Իսպանիայի ամենաշատ այցելվող թանգարանը։
