Եվրոպա լիգայի խաղարկության խմբային փուլի 5-րդ տուրում վաղը Պոլտավայի «Վորսկլան» կհյուրընկալի Լոնդոնի «Արսենալին»: Նախօրեին խոսվում էր, որ կապված Ուկրաինայի նախագահ Պյոտոր Պորոշենկոյի երկրում ռազմական դրության հայտարարելու հետ՝ հնարավոր է մրցավեճը չկայանա: Ավելի վաղ տեղեկություն էր տարածվել, որ հանդիպումն այնուամենայնիվ կայանալու է Պոլտավայում: Այսօր արդեն ՈՒԵՖԱ-ն որոշում է կայացրել անվտանգության նկատառումներով «Վորսկլա»-«Արսենալ» մրցավեճը Պոլտավայից Կիև տեղափոխելու մասին:
Մրցաշարային առումով առաջիկա հանդիպումը Ունայ Էմերիի թիմի համար այնքան էլ կարևոր չէ: Խմբային փուլի ավարտից երկու տուր առաջ «Արսենալը» ապահովել է մասնակցությունը փլեյ-օֆում: «Վորսկլան» միայն տեսական հնարավորությունն էր պահպանում ենթախմբում երկրորդ հորիզոնականը զբաղեցնելու: 4-րդ տուրից հետո E ենթախմբում «Արսենալն» ունի 10, Լիսաբոնի «Սպորտինգը»՝ 7, իսկ «Վորսկլան» և «Ղարաբաղը»՝ 3-ական միավոր: Առաջին հորիզոնականը զբաղեցնելու համար լոնդոնյան թիմին անհրաժեշտ է վաղը չպարտվել «Վորսկլային» և վերջին տուրում «Էմերիեյթս» մարզադաշտում հաղթել «Ղարաբաղին»:
Կարծում ենք՝ այս խնդիրը լոնդոնյան ակումբը կարող է լուծել նույնիսկ երկրորդ կազմով: Դեկտեմբերի 2-ին «Արսենալը» Պրեմիեր լիգայի 14-րդ տուրում կարևոր հանդիպում է անցկացնելու սկզբունքային մրցակից «Տոտենհեմի» հետ: Ենթադրվում է, որ Կիևում Էմերին անիմաստ ռիսկի չի դիմի և կխնայի հիմնական կազմի մի շարք ֆուտբոլիստների: Բրիտանական պարբերականների զգալի մասը «Արսենալի» հիմնական կազմում չի տեսնում նաև Հայաստանի ազգային հավաքականի ավագ Հենրիխ Մխիթարյանին: Վերջինս առանց փոխարինման մասնակցել էր Պրեմիեր լիգայի 13-րդ տուրի «Բորնմութի» հետ արտագնա մրցավեճին: Հիշեցնենք, որ այս խաղում Էմերին նկատելի փոփոխությունների էր գնացել՝ պայքարելով անսովոր 3-4-2-1 մարտավարությամբ: Ավելին, «Բորնմութի» հետ խաղաժամանակ չստացավ կիսապաշտպանության առաջատար Մեսութ Օզիլը:
«Այո, բոլորին է հետաքրքրում, թե ինչու «Բորնմութի» դեմ խաղում Օզիլը մնաց պահեստայինների նստարանին: Մենք որոշեցինք, որ այսպես ավելի լավ հանդիպում կանցկացնենք: Այս մրցավեճը պահանջում էր ֆիզիկական՝ կոշտ պայքար: Մեր թիմում բոլոր ֆուտբոլիստներն էլ իրենց ուրույն դերն ունեն: Նոր մարտավարությամբ մենք կատարելագործեցինք համագործակցության մակարդակը և կարծում ենք՝ լավ արդյունքի հասանք: Մրցաշրջանի սկզբում մենք միշտ խոսում էինք մրցունակ լինելու մասին: Պետք է լինել կարգապահ, բայց չմոռանալ նաև ֆուտբոլիստների անհատական որակների մասին: Միայն այդպես կարող ենք լուրջ խնդիրներ լուծել»,- ասել էր Էմերին:
Վերջին շրջանում Օզիլը իր հնարավորությունից խիստ ցածր էր հանդես գալիս: Դրա հետևանքով «Արսենալի» գրոհները արդյունավետ չէին: Եվ ահա սպասվում է, որ «Վորսկլայի» դեմ «Արսենալի» գլխավոր մարզիչը կրկին հնարավորություն կտա Օզիլին: Վերջինս, սակայն, ըստ ամենայնի չի խաղա ենթահարձակվողի դիրքում: Սպասվում է, որ Էմերին կընտրի 4-2-3-1 մարտավարությունը: Դարպասում կլինի Չեխը, իսկ պաշտպանության կենտրոնում՝ Մուստաֆին և 21-ամյա պաշտպան Պլեգուզուելոն: Աջ եզրում կխաղա Ջենկիսոնը, իսկ ձախ եզրում՝ Մայթլենդ-Նայլսը: Հենակետային գոտում կլինեն Էլնենին և Գենդուզին: Կիսապաշտպանության աջ եզրում կխաղա նաև երիտասարդ ֆուտբոլիստ Սմիթ Ռոուը: Ենթահարձակվողի դիրքում կգործի Ռեմսին, իսկ Օզիլը կկատարի ձախ կիսապաշտպանի պարտականությունը: Կենտրոնական հարձակվողի դիրքում էլ հանդես կգա 19-ամյա Նկետիան:
Այս կազմը ընտրելու դեպքում Էմերին հանգստանալու հնարավորություն կտա հիմնական դարպասապահ Լենոյին, պաշտպաններ Հոլդինգին, Բելերինին, Կոլաշինացին, կիսապաշտպաններ Ջակային, Մխիթարյանին, Իվոբիին, Տորեյրային և վերջապես հարձակման առաջատարներ Օբամեյանգին և Լակազետին:
Ի տարբերություն Էմերիի՝ «Տոտենհեմի» գլխավոր մարզիչ Պոչետինոն լոնդոնյան դերբիից առաջ առաջատարներին չի կարող խնայել: Չեմպիոնների լիգայի խաղարկության 5-րդ տուրում «Տոտենհեմն» այսօր կեսգիշերին կարևորագույն հանդիպում է անցկացնելու Միլանի «Ինտերի» հետ: Նույնիսկ ոչ-ոքի խաղալու դեպքում «Տոտենհեմը» վերջին տուրից առաջ կկորցնի հնարավորությունը ակումբային ամենահեղինակավոր մրցաշարի փլեյ-օֆում հայտնվելու: Հետևաբար Պոչետինոն այսօր ստիպված կլինի օգտագործել ողջ արսենալը: Այս առումով Էմերիի թիմը որոշակի առավելություն կարող է ունենալ «Տոտենհեմի» նկատմամբ:
Ինչևէ, բուքմեյքերները «Վորսկլա»-«Արսենալ» խաղում ֆավորիտ են համարում լոնդոնյան թիմին՝ վերջինիս հաղթանակի համար սահմանելով 1.75 գործակից: Ոչ-ոքին գնահատված է 3.75, իսկ «Վորսկլայի» հաղթանակը՝ 5.5 գործակցով: Այս ենթախմբի մյուս խաղում «Ղարաբաղը» Բաքվում մրցելու է «Սպորտինգի» հետ: «Վորսկլա»-«Արսենալ» հանդիպումը տեղի է ունենալու Կիևի «Օլիմպիական» մարզադաշտում և սկսվելու է Երևանի ժամանակով 21:55-ին:
