Երևանի ընդհանուր իրավասության դատարանի՝ Կենտրոն վարչական շրջանի տարածքում գտնվող նստավայրում Արմեն Բեկթաշյանի նախագահությամբ անդադար հետաձգումներից հետո պետք է շարունակվեր Նորք-Մարաշի զինված խմբի գործով դատական քննությունը՝ ըստ մեղադրանքի՝ «ՀՀ իշխանությունը յուրացնելու, զավթելու նպատակով ստեղծված հանցավոր համագործակցության» 20 անդամների՝ Արթուր Վարդանյանի,Վահան Շիրխանյանի, Անտոն Դիկրան Թոթոնջյանի, Գառնիկ Մարգարյանի, Վլադիմիր Առաքելյանի, Խաչիկ Ավետիսյանի, Ավետիս Բարեյանի, Վաղինակ Ստեփանյանի, Արթուր Եղիազարյանի, Վահագն Սալնազարյանի, Արման Հայրապետյանի, Էդվարդ Ներսիսյանի, Հարություն Սարիբեկյանի, Արա Պողոսյանի, Տիգրան Բոյաջյանի, Գևորգ Ջնդոյանի, Արկադի Մարդոյանի, Ասյա Մկրտչյանի, Մարինե Կաթանյանի, Նելլի Մինասյանի վերաբերյալ:
Նիստից րոպեներ առաջ արդեն դատարան էին ներկայացել ազատության մեջ գտնվող, այդ թվում՝ վերջերս ազատ արձակված ու բավական թարմացած ամբաստանյալները: Սակայն դատական նիստը դարձյալ տեղի չունեցավ:
Եվ հետաձգումը կատարվեց նախագահող դատավոր Արմեն Բեկթաշյանի ոճով՝ դատարանի դահլիճի դուռը այդպես էլ չբացվեց, նիստը դահլիճում չսկսվեց, հետաձգման մասին նիստի ժամանակ չհայտարարվեց: Դրսում հավաքվածների շրջանում խոսակցություն տարածվեց, որ դատավորը նիստի սկսվելուց 30 րոպե առաջ ազատ ամբաստանյալ Էդվարդ Ներսիսյանին առաջարկել է ստորագրել, որ ներկայացել է, ու չսպասել, որովհետև նիստը հետաձգվելու է:
Նիստի հետաձգումը պատճառաբանվել էր նրանով, որ դեռևս կալանքի տակ գտնվող ամբաստանյալ Վլադիմիր Առաքելյանը ենթարկվել է վիրահատության:
Վլադիմիր Առաքելյանի շահերի պաշտպան Արայիկ Ալվանդյանը, սակայն, պնդեց, որ պաշտպանական կողմը նախապես դատարանին զգուշացրել էր, թե Վլադիմիր Առաքելյանը անպայման ներկայանալու է նիստին, այսինքն՝ նրա պատճառով նիստը պիտի որ չհետաձգվեր:
Պաշտպան Արայիկ Ալվանդյանը նաև ասաց, որ օրեր առաջ այցելել էր Դատապարտյալների հիվանդանոցում գտնվող իր պաշտպանյալ Վլադիմիր Առաքելյանին ու իմացել էր, որ նա շատ վատ վիճակում է: Պաշտպանին, սակայն, հանգստացրել էին, թե Վլադիմիր Առաքելյանը հսկողության տակ է, ոչ մի վտանգավոր բան չկա: Նույն գիշերը Վլադմիր Առաքելյանին շտապ տեղափոխել էին Էրեբունի հիվանդանոց, որտեղ նա ենթարկվել է սրտի վիրահատության՝ երկու ստենդ է տեղադրվել:
Հատուկ այսօրվա դատական նիստին ներկա գտնվելու համար Վլադիմիր Առաքելյանը պահանջել էր իրեն դուրս գրել հիվանդանոցից: Բայց նրան դատարան չէին ներկայացրել: Վլադիմիր Առաքելյանի ինքնազգացողությունը վատացել էր…
Դատարանի մոտ հավաքված ազատ ամբաստանյալներն ու փաստաբանները , կալանքի տակ գտնվող ամբաստնյալների հարազատները մտածում էին՝ բողոքի ի՞նչ միջոցի դիմեն՝ այս գործով դատական նիստերի անընդհատ հետաձգումների դեմ: Նույնիսկ խոսք գնաց Տիգրան Մեծ փողոցը փակելու մասին: Սակայն մարդիկ որոշեցին սպասել մինչև հաջորդ նիստը: Միայն թե արձակուրդային այս շրջանում բացառված չէ, որ հաջորդ նիստն էլ հետաձգվի կողմերից որևէ մեկի չներկայանալու պատճառով: Ամեն դեպքում՝ մարդկանց համբերության բաժակը լցված է, հատկապես դեռ կալանքի տակ գտնվող այն ամբաստանյալների ու նրանց հարազատների, ովքեր նորից են դիմելու դատարան՝ խափանման միջոց կալանքը փոխելու միջնորդությամբ:
Լուսանկարը՝ Photolure-ի