«Առաջին լրատվական»-ի զրուցակիցն է 15 տարի Նկարիչների միությունը ղեկավարող Կարեն Աղամյանը: Այսօր Նկարիչների միության հերթական համագումարին նա առաջադրել է իր թեկնածությունը, իսկ նկարիչներն էլ ասում էին, որ, միանշանակ, ընտրության ելքը դեռ երեկ է կանխորոշվել. կընտրվի Կարեն Աղամյանը: Ի դեպ, համագումարը կտևի մինչև ուշ գիշեր:
-Պարոն Աղամյան, վերջերս մի քանի միությունների ընտրությունները աննախադեպ արդյունքներ ունեցան: Ի՞նչ ակնկալիքներ ունեք ՀՆՄ համագումարից:
–Կարծում եմ՝ նկարիչներս մի քիչ ավելի համեստ կգտնվենք: Կառուցողական ընթացք կլինի: Բոլորիս ցանկությունը դա է: Հետո կգա ընտրությունների ժամանակը, և կընտրվի նա, ում ծրագրին մեծամասնությունը հավանություն կտա:
-Ո՞ր խնդիրն է ամենաշատը մտահոգում:
-Ամենակարևոր խնդիրը՝ մեզ մոտ չկա օրենք ստեղծագործական միությունների մասին: Սա բոլոր միությունների ցավն է: Բացի դրանից՝ Հայաստանում չկան արվեստանոցներ ստանալու հնարավորություններ: Նկարիչն այսօր ապրում է ոչ այնքան վայել կյանքով, ինչին նա արժանի է: Թե ինչ պետք է անել, որ այս վիճակը փոխվի, այսօր երևի այս թեմաներով խոսակցություն կլինի:
-Խմորումներ կա՞ն այսօր: Նկարիչները բաժանվել են խմբերի, սատարում են տարբեր թեկնածուների:
-Անկասկած կլինի: Մեկը կհավատա իմ խոստումներին և ծրագրերին, մյուսը՝ մյուսի ծրագրերին: Բացի դրանից՝ մենք հայ ենք, քավոր-սանիկ հասկացողություններ կաշխատեն, ընկերական շրջապատ, բայց ես հույս ունեմ, որ բոլորը կլինեն ավելի օբյեկտիվ և ավելի արդար:
-Անկախության շրջանը ի՞նչ առավելություն տվեց Նկարիչների միությանը:
-Անկախությունը տվել է և՛ առավելություն, և՛ հակառակը: Առավելությունն այն է, որ աշխարհը բացվել է մեր առջև, նկարիչը կարող է ազատ ներս ու դուրս անել, այլ երկրներում ցուցադրվել, բայց արդյոք նա դրա հնարավորությունը ունի՞… Հիմնականում չունի: Սա էլ այն վատն է, որ տվել են մեզ այս տարիները:
Ամբողջական հարցազրույցը՝ տեսանյութում:
