Այսօր ՀՀ ռազմական ոստիկանությունում ԱԺ պաշտպանության, ազգային անվտանգության և ներքին գործերի մշտական հանձնաժողովը ԶՈՒ ժողովրդավարական վերահսկողության Ժնևի կենտրոնի մասնակցությամբ անցկացրեց մշտադիտարկման այց, որը կազմակերպվել էր ԵԱՀԿ երևանյան գրասենյակի աջակցությամբ: Ներկաները դիտարկեցին մարդու իրավունքների պաշտպանությունը զինված ուժերում, ՌՈ աշխատակիցների առաջ ելույթ ունեցան ԱԺ Ազգային անվտանգության, ներքին գործերի, պաշտպանության մշտական հանձնաժողովի նախագահ Կորյուն Նահապետյանը, հանձնաժողովի նախագահի տեղակալ, ԱԺ պատգամավոր Մարգարիտ Եսայանը, պաշտպանության նախարարության ռազմական ոստիկանության պետ Սամվել Ղուկասյանը:
Սամվել Ղուկասյանն իր խոսքում ընդգծեց, որ ՌՈ-ում տարվում է ամենօրյա քրտնաջան աշխատանք, որի շնորհիվ վերջին տարիներին կառույցը որակապես փոխվել է: «Եթե համեմատենք 2010 թվականի հետ, ապա այս տարի մահվան ելքով հանցագործությունները նվազել են 56.7 տոկոսով և դա մեր բոլորի աշխատանքն է»,- ասաց նա:
Նա նշեց, որ ՌՈ ստորաբաժանումները տեղակայված են բոլոր այն վայրերում, որտեղ կան զինվորական զորամասեր: Դրանք սպասարկում են տվյալ զորամասերը և պատասխանատվություն են կրում զորամասում հանցագործության աճի համար:
Նա հավաստեց, որ իրենք ի վիճակի են լուծելու բոլոր խնդիրները, որոնք իրենց առջև դրել է պաշտպանության նախարար Սեյրան Օհանյանը:
Ներկաները վերջում հանդիպեցին կալանքի ձևով պատիժ կրող զինծառայողների հետ, անոթացան պատիժը կրելու պայմաններին, հարցին՝ թե ի՞նչ խնդիրներ ունեք, զինծառայողները պատասխանեցին, որ որևէ խնդիր և հուզող հարցեր չունեն:
Մանրամասները դիտեք տեսանյութում:
