Թուրք չորս զինծառայողները, որոնա պատանդվել էին Քրդստանի աշխատավորական կուսակցության գրոհայինների կողմից, ազատ են արձակվել հատուկջոկատայինների գործողության արդյունքում: Այս մասին հայտնում է ITAR-TASS-ը՝ հղում անելով տեղի հեռուստատեսությանը: Զինվորականները չեն տուժել: Նրանց առողջական վիճակը լավ է:
Նրանք պատանդվել էին դեկտեմբերի 8-ի երեկոյան Դիարքբեքիրում: Զինվորականները մասնավոր ավտոմեքենաներով վերադառնում էին զորամաս՝ տրանսպորտային միջոցներ վարելու իրավունքի քննություն հանձնելուց հետո, երբ զինված գրոհայինները կտրել են նրանց ճանապարհը: Գրոհայինները եղել են առանց պետհամարանիշի ավտոմեքենայով: Նշվում է, որ զինծառայողները եղել են քաղաքացիական հագուստով:
Քրդստանի աշխատավորական կուսակցության անդամները ստուգել են զինծառայողների փաստաթղթերն ու նրանց տարել անհայտ ուղղությամբ: Իսկ մինչ այդ հրդեհել են ճանապահին արգելափակված մեքենաները:
Զինվորականների որոնման ու ազատ արձակման հատուկ գործողությունից մանրամասներ չեն հաղորդվում: Հայտնի է, որ ժանդամերիան տարածաշրջանում գործել է ավիացիայի աջակցությամբ:
