Երևանի ավագանին, կարելի է ասել, բավականին թեժ մեկնարկով բացեց աշխատանքային շաբաթը։ Եվ եթե դատենք վերջին նիստերից, ապա կարելի է ենթադրել, որ թեժության այդ նշաձողն առայժմ լուրջ դիմադրության չի հանդիպում, եթե չհաշվենք փոխկապավոր տղամարդկանց աքլորանալու հայտնի տեսարանը կոյուղաջուրը պայքարի միջոց նախընտրած Երկիր ծիրանիի կանանց մասնակցությամբ։ Պակաս ինտրիգային չէր «Երկիր ծիրանիի» այսօրվա նախաձեռնությունը։
Ներկայացված նախագծերից մեկով «Երկիր ծիրանի»-ն առաջարկում էր վերանվանել Վազգեն Սարգսյանի անվան փողոցի մի հատվածը Վուդրո Վիլսոնի անվամբ։
Նախագիծը բնականաբար մերժվեց, ինչպես և Մարտի մեկի զոհերի հիշատակին հուշարձանի տեղադրման առաջարկը։ Պարզ էր, որ այս էմոցիոնալ նախագծերը Երևանի ավագանու քաղաքական մեծամասնությունը ոչ միայն մերժելու էր, այլև տորպեդահարելու էր բոլոր այն փորձերը, որոնց ներսում քաղաքական ականներ է հայտնաբերում։
Առայժմ նիստերն անցնում են տանելի պայմաններում։ Միաժամանակ զգացվում է, որ քաղաքապետարանը հանրային փոքրիկ ողբերգությունների վերածվող այս անհարմարությանը դեռ չի ադապտացվել։ Հավանաբար քաղաքապետարանին նեղում են այն օրենքները, որոնց սահմաններում չարություն է անում քաղաքային իշխանության փոքրաթիվ ընդիմությունը։ Թեմայի շուրջ «Առաջին լրատվական»-ը զրուցել է Երևանի ավագանու «Ելք» խմբակցության ղեկավար Դավիթ Խաժակյանի և նույն խմբակցության անդամ Անի Խաչատրյանի հետ:
