Մերձավոր Արևելքի ավիաընկերությունները հաստատել են իրենց կարևոր կարգավիճակը համաշխարհային ավիացիայում՝ հայտնելով ընդհանուր 140 միլիարդ դոլարի գործարքների մասին: Դուբայի «Ավտոսրահ-2013»-ի առաջին օրվա ընթացքում Airbus և Boeing ընկերությունները ռեկորդային թվաքանակով պատվերներ են ստացել:
Emirates Airlines ավիաընկերությունը ստանձնել է Boeing-ից 777X մակնիշի 150 հեռահար ինքնաթիռների գնման նախնական պարտավորություն՝ գրում է Financial Times-ը: Այդ գործարքը կդառնա ԱՄՆ կոմերցիոն ավիացիայի մեջ խոշորագույն անհատական պատվերը և գնորդին կարժենա 55.6 մլրդ դոլար:
Կիրակի Դուբայում մեկնարկած ավիաշոուի ժամանակ Boeing-ը նաև հաստատել է խոշոր գործարքները Qatar Airways-ի և Etihad Airways-ի հետ:
Կատարի Qatar Airways-ն ու Աբու-Դաբիի Etihad Airways-ը համապատասխանաբար պատվիրել են 50 և 25 ինքնաթիռներ:
Այդ տեսակի օդանավեր գնելու կնքված պայմանագրերի ընդհանուր գումարը կազմում է ավելի քան 95 միլիարդ դոլար: Boeing-ի ղեկավար Ջեյմս ՄաքՆերնին այդ գործարքն արդեն անվանել է «ավիացիայի պատմության մեջ խոշորագույնը»՝ փոխանցում է Forbes-ը:
Բացի այդ, Emirates ավիաընկերությունը համաձայնել է Airbus-ից գնել A380 մոդելի 50 օդանավ: Գործարքները ցույց են տվել, որ այդ երեք ավիափոխադրողներն աշխարհում ամենաարագ զարգացող ավիաընկերություններից են:
Emirates-ի գործադիր տնօրեն շեյխ Ահմեդ բեն Սայիդ Ալ Մակտումը կանխատեսում է, որ Dubai World Central-ը, որում ներկայում տեղակայված է Դուբայի օդանավակայանը, շուտով կդառնա աշխարհում ամենամեծ օդանավակայանը: Նա նաև ընդգծել է, որ Դուբայն այժմ դարձել է Արևելքն ու Արևմուտքը միացնող հանգույց:
«Վերջին ժամանակներս համաշխարհային ավիացիան տեղափոխվել է Մերձավոր Արևելք, քանի որ ԱՄԷ-ն ու Կատարը սկսել են ամբողջովին կիրառել իրենց աշխարհագրական առավելությունները»,- պարզաբանել է նա:
Emirates, Qatar և Etihad ավիափոխադրողները ծրագրում են շուկա դուրս բերել Boeing 777Х նոր մոդելը: Qatar-ը կգնի 70 նման մոդելներ, Etihad-ը՝ 25:
Etihad-ը նաև ծրագրում է Boeing-ից գնել 30 Dreamliner օդանավեր:
Այսպիսով՝ ավիափոխադրողը կդառնա վերջին շրջանում այդ ընկերության ինքնաթիռների խոշորագույն գնորդը:
