Վրաստանի նորընտիր նախագահի՝ Գեորգի Մարգվելաշվիլիի երդմնակալության արարողությունը տեղի կունենա վաղը: Նոյեմբերի 16-ին լրագրողների հետ հանդիպմանը ՀՀԿ անդամ, Վիրահայերի միասնություն հայրենակցական միության նախագահ Տաճատ Վարդապետյանը նշեց, որ ընտրություններն իրենց թափանցիկությամբ որակական չափանիշներին համապատասխանեցին, տեղի ունեցան արդար, թափանցիկ ընտրություններ, ինչը տարածաշրջանում մեծ ձեռքբերում է:
«Մենք գիտենք՝ դեռևս մեկ տարի առաջ խորհրդարանական ընտրությունների ժամանակ Բիձինա Իվանիշվիլին ինչպիսի խոստումներ տվեց վիրահայերին: Այդ նախընտրական խոստումները իրագործելու համար ոչ մի խոչընդոտ չի կարող լինել, և մենք ակնկալում ենք, որ նոր իշխանությունները կիրագործեն իրենց խոստումները»,- ասաց նա:
Վարդապետյանի խոսքով՝ Իվանիշվիլին ամբողջովին դուրս չի գալու քաղաքականությունից, իսկ Մարգվելաշվիլին վիրահայության համար նախընտրելի թեկնածու է: Ներքին գործերի նախարար Իրակլի Գարիբաշվիլին թեև շատ կարճ ժամանակ է ղեկավարել այդ կառույցը, սակայն կարելի է ասել, որ այդ ոլորտում դրական տեղաշարժեր կային, ուստի վիրահայերն ակնկալում են, որ նրա՝ վարչապետ դառնալու արդյունքում Վրաստանը կընթանա դեմոկրատացման ճանապարհով:
«Մենք ակնկալում ենք, որ այլևս խոչընդոտներ չեն կարող լինել վիրահայերին տրված խոստումներն իրականացնելու համար հիմա, երբ Վրաստանում վերացել է երկիշխանության մթնոլորտը: Շատ կարևոր է Վրաստանում երկքաղաքացիության մասին օրենքի ներդրումը, որի մասին արդեն խոսել է նորընտիր նախագահը»,- ասաց նա:
Վարդապետյանի խոսքով՝ Սաակաշվիլին եկավ իշխանության, և իրենք մեծ ակնկալիքներ ունեին, սակայն դրանք չիրականացան: Նա կարծիք հայտնեց, որ պետք է զարգացնել նաև խորհրդարանական դիվանագիտությունը, և հույս հայտնեց, որ Վրաստանի նոր իշխանություններն այդ ուղղությամբ քայլեր կձեռնարկեն: Ջավախքում, ըստ բանախոսի, դրական տեղաշարժ նկատվում է, սակայն նա խուսափեց կանխորոշել Սաակաշվիլիի ճակատագիրը, սոսկ նշեց՝ դա ժամանակը ցույց կտա:
Հայաստանի ներքաղաքական թեմաներին անդրադառնալով՝ Վարդապետյանը հրաժարվեց խոսել արտահերթ նիստի տապալման մասին՝ նշելով, որ իրենց խմբակցության ղեկավարն արդեն պարզաբանել է դա, կենսաթոշակային բարեփոխումների վերաբերյալ իր դիրքորոշումը ևս համընկնում է քաղաքական մեծամասնության տեսակետի հետ, իսկ Շանթ Հարությունյանի նկատմամբ իր վերաբերմունքը բացասական է:
Լուսանկարը՝ Photolure-ի
