Բարձրագույն կրթության ոլորտում 2018 թվականին կառուցվածքային, կառավարչական և մի շարք այլ փոփոխություններ են իրականացվելու։ Այս մասին տեղեկացրին ՀՀ կրթության և գիտության նախարարությունից։
«Բարձրագույն կրթության առաջիկա մարտահրավերներից է «Բարձրագույն կրթության մասին» ՀՀ նոր օրենքի ընդունմամբ պայմանավորված ենթաօրենսդրական նոր ակտերի ընդունումը: Նախատեսվում է իրականացնել բարձրագույն կրթության բարեփոխումներ` մասնավորապես կառուցվածքային, կառավարչական, ֆինանսավորման, ընդունելության, դասավանդման և բովանդակության որակի, կրթություն-գիտություն և տնտեսություն կապի, կրթության միջազգայնացման և այլնի ուղղությամբ»,- նշում են նախարարությունից։
Բուհերի ֆինանսական կառավարման գործառույթները գիտական խորհրդից անցնելու են կառավարման խորհրդի, բարձրագույն կրթության կառավարման տեղեկատվական միասնական համակարգն ավելի է կատարելագործվելու և գործարկվելու է՝ բուհական և ազգային մակարդակներում։ Այսուհետ լինելու է պաշտոնական տեղեկատվության տրամադրում(վիճակագրություն, հաշվետվություն, այդ թվում գործունեության հիմնական ցուցանիշներ և այլն)՝ բարձրագույն կրթության և հետազոտությունների համակարգի կառավարման և մշտադիտարկման մասին։
Բարձրագույն կրթության ֆինանսավորման և ընդունելության բարեփոխումների համար պետք է իրականացնել բուհերի ֆինանսավորման աղբյուրների դիվերսիֆիկացիա, մասնավորապես վարձերով պայմանավորված մասնաբաժնի կրճատում։
«Բուհերի ֆինանսավորման կայունացման նպատակով անձեռնմխելի ֆոնդեր պետք է ձևավորվեն։ Պետական բյուջեից ֆինանսական միջոցների հատկացման սկզբունքները ենթակա են վերանայման և անհրաժեշտ է փոփոխում՝ ներդնելով բազային, կրթաթոշակային և մրցակցային (առաջադիմություն, կարիքավորություն, գերակա մասնագիտություններ) ֆինանսավորման մեխանիզմներ՝ հիմնված արդյունավետության ցուցանիշների վրա:
«Բարձրագույն կրթության մասին» ՀՀ նոր օրենքի ընդունումը պայմանավորված է բարձրագույն կրթության բնագավառում կրթության կազմակերպման, իրավակազմակերպական, ֆինանսական հարաբերությունների հստակեցմամբ, անկախ բարձրագույն ուսումնական հաստատությունների կազմակերպաիրավական ձևից ու կարգավիճակից, նրանց ակադեմիական, կառավարման, ֆինանսական հարաբերությունների ընդհանուր սկզբունքների, պայմանների և պահանջների հստակ սահմանման և ապահովման, ինչպես նաև՝ բարձրագույն և հետբուհական մասնագիտական կրթության ոլորտը կանոնակարգող «Կրթության մասին» և «Բարձրագույն և հետբուհական մասնագիտական կրթության մասին» ՀՀ օրենքներում առկա հակասությունների կարգավորման անհրաժեշտությամբ:
