Վրաստանի պետական աուդիտի հաշվետվությունն այն մասին, որ 2016-2017 թվականներին օգտագործվել է կյանքի համար վտանգավոր պատվաստանյութի մոտ 30 հազ. չափաբաժին, մեծ աղմուկի պատճառ է դարձել: Իր հերթին Առողջապահության նախարարությունը մարդկանց վստահեցնում է, որ սարսափելի ոչ մի բան տեղի չի ունեցել:
Պետաուդիտի տվյալներով՝ Առողջապահության համաշխարհային կազմակերպությունը առաջարկել է օգտագործումից հանել «կյանքի համար վտանգավոր» պատվաստանյութը: Հաշվետվության մեջ նշված է, որ դեղը մինչ այդ չի անցել անհրաժեշտ գրանցումը, սակայն Վրաստանի հատուկ հանձնաժողովը այնուամենայնիվ այն թույլատրել է պատվաստման համար: Նախարարությունից հայտնել են, որ խոսքը ոչ թե մանկական պատվաստումների մասին է, ինչպես շատերը մտածել են, այլ կատաղության դեմ պատվաստման մասին: «Հրապարակված տվյալները չեն համապատասխանում իրականությանը: Պատվաստանյութը վերաորակավորվել է Առողջապահության համաշխարհային կազմակերպության կողմից և որևէ կողմնակի ազդեցություն չունի»,- ասել է Վրաստանի հանրային առողջապահության և հիվանդությունների վերահսկողության ազգային կենտրոնի տնօրեն Ամիրան Գամկրելիձեն:
