Մաքսային միություն մտնելու դեպքում կթանկանան նաև հենց այդ Միության երկրներից Հայաստան մտնող ապրանքների գները: Որովհետև Ռուսաստանից, Բելառուսից ու Ղազախստանից Հայաստան ներմուծվող ապրանքները տեղափոխվում են Վրաստանով (օդային ճանապարհով չնչին բացառությունները չհաշված), որը Մաքսային միության անդամ չէ` երրորդ երկիր է: Իսկ Մաքսային միության կանոնադրության համաձայն՝ այդ միության անդամները երրորդ երկրներից պետք է Միության (ավելի ճիշտ՝ Կրեմլի) սահմանած ավելի բարձր մաքսատուրքերով ապրանք ներմուծեն:Այսինքն՝ մտնելով մաքսային միություն, մենք ստիպված ենք լինելու բարձրացնել նաև Վրաստանից ներմուծվող ապրանքների մաքսատուրքերը: Եվ ակնհայտ է, որ երբ մենք բարձրացնենք Վրաստանից ներմուծվող ապրանքների մաքսատուրքերը, փոխարենը Վրաստանը կբարձրացնի իր երկրով Հայաստան փոխադրվող ապրանքների համար վճարները: Արդյունքում՝ Ռուսաստանից Հայաստան ներմուծվող բոլոր ապրանքների ինքնարժեքը, հետևաբար՝ նաև գները կաճեն:
Հիշեցնենք, որ Ռուսաստանից այժմ բոլոր ապրանքները մենք ներմուծում ենք 0% տոկոսադրույքով, այսինքն՝ Մաքսային միությանը մեր անդամակցումը այս առումով ոչինչ չի փոխի: Նմանապես՝ բոլոր ապրանքները ՌԴ մենք արտահանում ենք 0% մաքսատուրքով: Եվ երբ Վրաստանը բարձրացնի տրանզիտի ծախսերը, կմեծանա ոչ միայն ՌԴ-ից Հայաստան ներմուծվող ապրանքների, այլև Հայաստանից ՌԴ արտահանվող ապրանքների ինքնարժեքը: Այլ կերպ ասած՝ կդժվարանա մեր արտահանումը հենց Մաքսային միության
երկրներ:
Իսկ այն ապրանքները, որոնք ներմուծում ենք ոչ թե Ռուսաստանից (Ղազախստանից/Բելառուսից), այլ երրորդ երկրներից, կթանկանան երկու գործոնի պատճառով՝ ա. մաքսատուրքերի բարձրացման պատճառով, բ. Վրաստանով բերվողները (հիմնական մասը)՝ նաև տրանզիտի թանկանալու պատճառով:
Այսպիսով, մտնելով Մաքսային միություն՝ Հայաստանը կվատթարացնի իր առևտրային հարաբերությունները ոչ միայն Մաքսային միությունից դուրս գտնվող (երրորդ), այդ թվում՝ ԵՄ երկրների, այլև հենց Մաքսային միության երկրների (այդ թվում՝ Ռուսաստանի) հետ: Եվ կթանկանան ոչ միայն երրորդ երկրներից Հայաստան ներմուծվող ապրանքները, այլև հենց Ռուսաստանից ու Բելառուսից ներմուծվողները:
