Խորհրդարանական ընտրություններին ՕՐՕ դաշինքի շրջանակներում արձանագրած ձախողումից, կուսակցության շարքերը նոսրանալուց հետո խոր ընդհատակում հայտնված «Ժառանգություն» կուսակցության առաջնորդ Րաֆֆի Հովհաննիսյանը դեռևս խոսում է ընդդիմադիր ճակատ ստեղծելու և իշխանության վերարտադրությունը 2018 թվականի գարնանը կանխելու համար: «Ժառանգության» հիմնադրման 15-ամյակի միջոցառմանը Րաֆֆի Հովհաննիսյանը հայտարարել է, որ գարնանը «Ժառանգությունից» ակտիվ քայլեր կարելի է ակնկալել: Հիմա ժողովրդի տրամադրություններն են շոշափում, ակտիվացնում մարզային կառույցները: «Եթե ժողովուրդն այդ պահանջարկը ներկայացնի, եթե ժողովուրդն ուզում է փոփոխություն, պատրաստ է նաև ակտիվ, նախաձեռնող քայլերի, ինչու չէ, մենք պետք է հրապարակային, հանրային քայլերով ամեն ինչ անենք, որ տեղի չունենա այդ մենիշխանության շարունակությունը: Մենք կարծում ենք, որ դա կործանարար կլինի մեր ապագայի համար: Կարող եք գարնան ընդառաջ՝ «Ժառանգությունից» և ոչ միայն «Ժառանգությունից» սպասել ակտիվ նախաձեռնություններ»,- «Ազատության» հետ զրույցում ասել է Րաֆֆի Հովհաննիսյանը:
Քաղտեխնոլոգ Կարեն Քոչարյանին արժանահավատ չեն թվում «Ժառանգության» առաջնորդի խոսքերը: Քոչարյանի դիտարկմամբ, եթե ակտիվացման վերաբերյալ հայտարարությունն աներ կուսակցության որևէ այլ անդամ, ապա ինքը դրան ավելի լուրջ կվերաբերվեր, քան երբ դա անում է Րաֆֆի Հովհաննիսյանը: «Նա պարբերաբար խոսում է՝ եթե ժողովուրդն ուզի, եթե ժողովուրդն այդ պահանջը ներկայացնի… Ես խորհուրդ կտայի, նախ, առանց եթե-ների խոսել, ապա այդ բևեռը ձևավորի, նոր հայտարարություն անի: Բայց երբ 3 ամիսը մեկ հայտարարում է, թե կնախաձեռնի ընդդիմության միավորումը, արդեն լուրջ չէ: Տպավորություն է, թե խոսքը 25 տարի շարունակ խոսվող թեժ աշնան մասին է: Ոչ մի տարբերություն: Եվ հետո, կարծում եմ, ժողովուրդն էլ արդեն վաղուց լուրջ չի ընդունում Րաֆֆի Հովհաննիսյանին: Եթե ժողովուրդն ինչ-որ բան էլ պահանջի, ուզենա անել, հաստատ դա չի անի Րաֆֆի Հովհաննիսյանի միջոցով»,- «Առաջին լրատվական»-ի հետ զրույցում ասաց Քոչարյանը՝ հավելելով, որ փոփոխություն պահանջող ժողովուրդը փոփոխություն չի պահանջի մի լիդերից, որն իրենց հետո տանելու է աղոթելու: «Դա ես վստահաբար կարող եմ պնդել»,- ընդգծեց քաղտեխնոլոգը:
Կարեն Քոչարյանի դիտարկմամբ՝ 2018-ի ապրիլից առաջ առհասարակ որևէ նախադրյալ չկա ընդդիմադիր բևեռ ձևավորելու և կանխելու 2018-ի գարնանը սպասվող հնարավոր զարգացումները: «Այսօր որևէ նախադրյալ չկա, որևէ ռեսուրս ես չեմ տեսնում: Եթե մի փոքր ժողովրդական լեզվով ասեմ՝ խորհրդարանական ընտրություններից հետո բոլոր ընդդիմադիր ուժերը խոր մանթրաշի մեջ են ու մինչև հիմա դուրս չեն եկել այդ մանթրաշից: Բայց քաղաքական ուժերը, քաղաքական գործիչները չպետք է մանթրաշի կատեգորիաներով առաջնորդվեն»,- նշեց Քոչարյանը:
Մեր դիտարկմանը՝ թե կարելի՞ է արձանագրել, որ 2018-ի ապրիլն անցնելու է բավական սահուն, առանց լուրջ դիմակայության ընդդիմադիր դաշտի կողմից, քաղտեխնոլոգը նկատեց. «Եթե սահուն չանցնի, ապա միայն ներհանրապետական շրջանակներում: Մնացած բոլորն այդտեղ անելու գործ չունեն: Բազմիցս է ասվել, որ ՀՀԿ-ն հաղթել է խորհրդարանական ընտրություններին և ՀՀԿ-ի գործն է, թե ով է լինելու վարչապետ: Դա ՀՀԿ-ի ներքին գործն է: Մնացածը կողքից կարող են միայն նայել, ուրախանալ կամ տխրել, բայց միայն նայել, ուրիշ ոչ մի բան չեն կարող անել: Միայն դիտորդի կարգավիճակում կարող են լինել»:
