Ղրղըզստանում մտադիր են արգելել աջ ղեկով տաքսիները։ Օրենքում համապատասխան փոփոխությունները դրվել են հանրային լսումների։ Այս մասին հայտնում է currenttime.tv-ն։
Եթե երկրի քաղաքացիները հավանություն տան նորմին, փաստաթուղթը կներկայացվի խորհրդարանի քննարկմանը։ Վարորդների շրջանում նախաձեռնությունն արդեն իսկական խուճապ է առաջացրել։
Ղրղըզստանում տաքսիների մեծամասնությունն աջ ղեկով է՝ բերված Ճապոնիայից։ Դրանց գլխավոր առավելությունը ցածր գինն է։
Կոմերցիոն նպատակներով կիրառվող աջ ղեկով մեքենաների արգելման գաղափարը Ղրղըզստանում առաջանում է ոչ առաջին անգամ։
Մի քանի տարի առաջ ընդունվել էր համապատասխան օրինագիծ, որն այնուհետև հետաձգվել էր մինչև 2020 թվականը, սակայն համաձայն նոր օրինագծի՝ աջ ղեկով մեքենաներով ուղևորներ տեղափոխելու համար տուգանքներ կարող են սահմանել արդեն նոր տարուց։ Իշխանությունների կարծիքով՝հենց ղեկի աջ դիրքն է դառնում բազմաթիվ վթարների պատճառ։
