Հայաստանի Հանրապետության Ազգային ժողովի պետաիրավական հարցերով մշտական հանձնաժողովի հոկտեմբերի 1-ի նիստում համաներման քննարկումն օրենքով սահմանված կարգով փակ- գաղտնի է եղել: ՕԵԿ պատգամավոր, հանձնաժողովի նախագահի տեղակալ Հովհաննես Մարգարյանը լրագրողների հետ զրույցում խնդրեց զգուշավոր մոտեցում ցուցաբերել այս գաղտնիության հարցին, որ ձևական բնույթ չի կրում:
«Իրոք փակ նիստ է եղել, և հաշված ժամեր հետո կներկայացվի լիագումար նիստում: Փաստաթուղթը քննարկման առարկա կդառնա, և ավելի մանրամասն անդրադարձ կլինի այն բոլոր հոդվածներին, որոնց վրա համաներումը տարածվում է: Պիտի ասեմ՝ դեռ նախորդ համաներումը տարածվեց շուրջ հազար հիսուն դատապարտյալի վրա, իսկ այս համաներումն ավելի ընդգրկուն է»,- ասաց նա:
Պետաիրավական հարցերով մշտական հանձնաժողովը տվել է դրական եզրակացություն, որպեսզի որոշման նախագիծը լիագումար նիստում քննարկվի: Դիտարկմանը, թե՝ կարծիք կա, որ համաներման նպատակը Տիգրան Առաքելյանին ազատ արձակելն է և ՔԿՀ-ների թեթևացումը, Մարգարյանը նշեց, որ չի ուզում անդրադառնալ այդ հանգամանքին:
«Սա հերթական համաներումն է, որը մարդասիրական քայլ է: Այսօրվա դրությամբ՝ ծանրաբեռվածության տեսանկյունից, եթե հաշվի ենք առնում արդարադատության նախարարի տրամադրած տվյալները, այդպես չէ, դա էական նշանակություն չունի, ՔԿՀ-ներն այդքան ծանրաբեռնված չեն, զուտ մեր բանտարկյալների թվային տվյալներով: Այսինքն՝ հիմնական պատճառը մարդասիրությունն է, հումանիզմը»,-ասաց նա: Մարգարյանի խոսքով՝ նախորդ համաներումից հետո ազատվածների ընդամենը 4.8 տոկոսն է կրկնահանցագործ, այսինքն՝ 1051-ից շուրջ 49-50 հոգի: ՕԵԿ պատգամավորը կրկին խնդրեց հարցին զգուշորեն մոտենալ. մարդիկ լսում են, որ իրենց վրա համաներում պետք է տարածվի, և հետո հանկարծ չի տարածվում:
Մարգարյանը տեղեկացրեց, որ համաներման փաստաթղթի քննարկումն ԱԺ-ում կլինի հնարավորինս շուտ, հավանական է՝ հենց այս քառօրյայի ընթացքում:
