ԼՂՀ ՊԲ հրամանատար Լևոն Մնացականյանը երեկ Հանրայինի եթերում նշել է, որ Ադրբեջանի նոր հարձակման դեպքում մենք անցնելու ենք հակահարձակման ու ընդլայնելու ենք անվտանգության գոտին:«Այդ հակահարձակողական գործողությունների ընթացքում մենք ընդլայնելու ենք այսօրվա մեր գոյություն ունեցող անվտանգության գոտու լայնությունը և անվտանգության գոտու խորությունը, 2016թ ապրիլյան գործողությունների այդ սահմանափակ հենակետերը, որ անցել են իրենց հսկողության տակ, միանշանակ վերականգնվելու են»,-ասել է գեներալը:
Մնացականյանն, անշուշտ, տվյալ դեպքում, արտահայտում է ոչ միայն պաշտոնական Ստեփանակերտի, այլ` հայկական զույգ պետությունների ռազմա-քաղաքական էլիտաների ընդհանրական դիրքորոշումը: Օբյեկտիվորեն Հայաստանն ու Արցախը շահագրգռված չեն նոր պատերազմով, որովհետև հայկական դիվանագիտությունը նպատակ ունի անրապնդել ներկա ստատուս-քվոն, որն Ադրբեջանի արկածախնդիր քաղաքականության հետևանքով ավելի իրական է դարձնելու Արցախի միջազգային ճանաչման հեռանկարը:
Մյուս կողմից` Մնացականյանի հարցազրույցում ընդգծված է զինվորականի հաստատակամության և դիվանագիտական զսպվածության ներդաշնակությունը: Գեներալը հստակ հասկացնում է, որ հայկական կողմը պատրաստ է պատերազմի և նույնիսկ նշում է այն հնարավոր կորուստը, որ կարող է ունենալ Ադրբեջանը` կորցնելով անցյալ տարվա ապրիլյան պատերազմի աննշան ձեռքբերումը: Նույնիսկ Ադրբեջանի ագրեսիվ քարոզչության և սադրանքների ֆոնին մեր ռազմա-քաղաքական էլիտան հավատարիմ է մնում ստատուս-քվոն ամրապնդելու և բանակցելու մարտավարությանը, որովհետև Արցախի բանակի ղեկավարը խոսում է ընդամենը հարկադրված հնարավոր պաշտպանական գործողությունների, 1994-ի զինադադարով ամրագրված սահմանների վերականգնման մասին և որևէ խոսք անգամ չկա Ադրբեջանը կապիտուլացնելու կամ Ադրբեջանի այնպիսի տարածքների գրավման մտադրության մասին, որոնք առնչություն չունեն Արցախի անվտանգության հետ:
Շատ կարևոր է, որ Ադրբեջանի սադրանքներին հակադարձելու հաստատակամության հետ մեկտեղ` հայկական ռազմա-քաղաքական ղեկավարությունը բարձրաձայնի դիրքորոշումներ, որոնք համահունչ են միջազգային համատեքստին, միջնորդների օրակարգին: Լևոն Մնացականյանին դա երեկ հաջողվեց: