Արմավիրի մարզպետի խորհրդական Մանուկ Սիմոնյանի սպանության գործով նախաքննության նյութերի`իշխանության թողտվությամբ կազմակերպվող արտահոսքերն ուղղակի ոչնչացնում են գործն արդարացի ու լրիվությամբ քննելու հնարավորությունը ու սա արդեն պրակտիկա է դարձել Հայաստանի իրավապահ համակարգի համար: Տեղի է ունեցել աննախադեպ ողբերգություն, որն, ըստ էության, կործանեց մի ամբողջ ընտանիք ու` ոչ միայն, որովհետև այս օրերին փշրվում են նաև հանրային պատկերացումները հայկական ընտանիքի ավանդական մոդելի, դրա իդեալականության միֆի մասին:
Ողբերգությունը վերածվեց թամաշայի՝ վեր հանելով թե՛ անմեղության կանխավարկածի, թե՛ մարդու անձնական ու ընտանեկան կյանքի անձեռնմխելիության, թե՛ նախաքննական գաղտնիքի սկզբունքների պահպանման, թե՛ լրատվությունը ասեկոսեների հետ շփոթելու խնդիրները շոշափող հիմնահարցեր՝ ծառայելով հանրային բնական հետաքրքրությունը բավարարելու գործոնին։ Բնավ նպատակ չունենք արդարացնել ինքնադատաստանի դեպքերը, սակայն այս օրերին մեր «ամենազոր» մենթալիտետն ու պետական մեքենան ձեռնարկել են իսկական քարոզչական «գրոհ» ընտանեկան բռնությունը խրախուսելու, երկրում տիրող իրավական նիհիլիզմն անուղղակիորեն արդարացնելու նպատակով: «Զարհուրելի կնոջ», «անաղուհաց որդու» կերպարների ստեղծումը նպատակ ունի լեգիտիմացնել կնոջ նկատմամբ բռնության հիմքով ստեղծված նահապետական ընտանիքի մոդելը, ինչպես նաև արդարացնել պետության անգործությունը ընտանեկան բռնության կանխարգելման արդյունավետ իրավական մեխանիզմներ ստեղծելու հարցում: Ըստ էության`գործ ունենք պարբերաբար բռնության ենթարկված, անօգնական ու անպաշտպան կնոջ հետ, որը անզոր է եղել իր ամուսնու առաջ, որը նաև «պաշտպանված» է եղել իր պետական պաշտոնով:
Ընտանեկան բռնությունը Հայաստանում սովորական երևույթ է, զարմանալին այն է, որ Հայաստանում` պաշտոնյաների վարքագծային հատկանիշներով, մշակված չեն նրանց աշխատանքի ընդունման կամ աշխատանքից ազատման չափանիշներն ու մեխանիզմները: ԱՄՆ-ում, օրինակ, որևէ մեկը չի կարող պետպաշտոնյա դառնալ, եթե նրա հոռի հակումների մասին որևէ արժանահավատ տեղեկատվություն կա: Իհարկե, ամենևին կասկածի տակ չենք դնում տեղի ունեցածի ընտանեկան-կենցաղային վարկածը, սակայն պետությունն այն տիրաժավորում և ընդգծում է՝ հանրային ուշադրությունն այս ողբերգության հետ կապված ավելի խորքային խնդիրներից շեղելու նպատակով: