Այսօր «Ժառանգություն» կուսակցությունը հայտարարություն է տարածել, որը երևի ամենահամարժեքն է այս քաղաքական ուժի վերջին տարիների գործունեության մեջ: Այս հայտարարությունը, ըստ էության, առաջին պաշտոնական քաղաքական արձագանքն է էներգետիկայի ոլորտում ներդրումներ անելու ԱՄՆ-ի, Ֆրանսիայի և Գերմանիայի առաջարկներին: Րաֆֆի Հովհաննիսյանի կուսակցությունն իշխանություններից պահանջում է իրավական և գործնական բոլոր քայլերն իրականացնել էներգետիկայի և մյուս բոլոր ոլորտներում ներդրումներ ապահովելու ու պետության անկախության, ինքնիշխանության ամրապնդման համար: Հայտարարությունը սակայն միայն հռչակագրային չէ և դրանում արտահայտված է կոնկրետ պահանջ` չեղյալ հայտարարել 2013 թվականին կնքված հայ-ռուսական գազային հակապետական պայմանագիրը:
Ամբողջ խնդիրն այն է, որ «Ժառանգությունն» այսօր ոչ միայն արտախորհրդարանական, այլ նաև, ըստ էության, մարգինալ ուժ է, որն ասոցացվում է, օրինակ, «Սասնա ծռերի» հետ: Այսինքն՝ մեծ ցանկության դեպքում, Հայաստանի և Ռուսաստանի իշխանությունները «Ժառանգության» խիստ տրամաբանական պահանջը կարող են մատուցել` որպես մի խումբ ծայրահեղականների կարծիք:
Ցանկալի կլինի, որ խորհրդարանական միակ ընդդիմադիր խմբակցությունը` «Ելքը» մի կողմ դնի ներկուսակցական հակասությունները և իր համերաշխությունը հայտնի առաջադրված պահանջին և այն դարձնի քաղաքական մագիստրալ օրակարգի մաս, մանավանդ, որ Էդմոն Մարուքյանն օրեր առաջ ասել էր, թե նախաձեռնելու է ԵՏՄ-ից Հայաստանի դուրս գալու գործընթաց:
Ի վերջո, ԵՏՄ-ից Հայաստանի դժգոհության հիմնական պատճառներից մեկը հայ-ռուսական աղճատված հարաբերություններն են, որոնցում էներգետիկ կամ գազային բաղադրիչն առանցքային դեր ունի: Մյուս կողմից` ԵՏՄ-ից Հայաստանի դուրս գալու գործընթացը նախապատրաստել է պետք. դա մեկանգամյա գործընթաց չէ և չի սահմանափակվում միայն խորհրդարանական ձևաչափով: Նույն «գազային» հարցն այդ մեծ օրակարգի բաղկացուցիչն է, ասել կուզի` ԵՏՄ-ից Հայաստանի դուրս գալու գործընթացը «Ելքը» կարող է գեներացնել խորհրդարանական փոքր նախաձեռնություններով` խորհրդարանից դուրս ձևավորելով քաղաքական համաձայնություններ ապագաղութացման օրակարգով և այն դարձնելով հասարակությանն ակտիվացնելու և մոբիլիզացնելու գործոն:
ՀՀԿ պատգամավորները գրեթե ամեն օր արձագանքում են Մարուքյանին թույլ և անբովանդակ փաստարկներով: «Ելքը» պետք է անցնի տոտալ գրոհի` «ռուսական» հարցը դարձնելով քաղաքական դաշտի հիմնական ջրբաժանը:
