Հայաստանի ազգային հավաքականի և «Մանչեսթեր Յունայթեդ»-ի կիսապաշտպան Հենրիխ Մխիթարյանը Հանրապետության տոնի առիթով ՀՀ նախագահ Սերժ Սարգսյանի կողմից պարգևատրվեց «Հայրենիքին մատուցած ծառայությունների համար» 1-ին աստիճանի մեդալով: Հենրիխ Մխիթարյանը պարգևատրվել է հայկական սպորտի զարգացման գործում ունեցած ավանդի և Հայաստանն աշխարհում լավագույնս ներկայացնելու համար:
Նշենք, որ Մխիթարյանը Հայաստանի ազգային հավաքականում հանդես եկած առաջին ֆուտբոլիստն է, որ արժանանում է նման պարգևի: Սպասվածի համաձայն՝ մեր հավաքականի ավագի՝ Սերժ Սարգսյանից մեդալ ստանալը ոչ միանշանակ արձագանքի արժանացավ: Մասնավորապես, ազգաբնակչության մի մասի պնդմամբ՝ Մխիթարյանը չպետք է վերցներ թալանչի և հանցագործ իշխանության պարգեևը: Հենրիխ Մխիթարյանը, դառնալով հայկական ֆուտբոլի սիմվոլը և լինելով աշխարհում ամենաճանաչված ու սիրված հայերից մեկը, չէր գնահատվել թերևս ՀՀ իշխանությունների կողմից: Որքան էլ ցավալի է, հասարակության գերակշռող մասը տարիներ շարունակ մեր իշխանությանը և մասնավորապես նախագահ Սերժ Սարգսյանին համարում է արատավոր, կոռումպացված և քրեականացված մի տարր: Արատավոր իշխանության հետ համագործակցող կամ առնչվող կառույցները, ուժերը, անձինք ազգաբնակչության մի հատվածի կողմից քննադատության են արժանանում, երբեմն նաև՝ քարկոծվում:
Մեր ժողովրդի մի հատվածը այդպես էլ չի կարողանում ընկալել, որ Մխիթարայանը իրականում վերցրեց ոչ թե Սերժ Սարգսյանի կամ արատավոր իշխանության, այլ պետության մեդալը: Հայաստանի հավաքականի ավագը վերցրեց հայաստանցի միլիոնավոր երկրպագուների մեդալը: Եթե չլիներ ֆուտբոլասերների հսկայական աջակցությունը, ուշադրությունը Մխիթարյանի հանդեպ, ապա դժվար թե Սերժ Սարգսյանը հանձներ նրան այդ պարգևը: Հայաստանի ներկայիս նախագահը ընդամենը ներկայացուցիչն է պետության: Պետություն, որը Մխիթարյանի շնորհիվ ճանաչելի դարձավ աշխարհում:
Ֆուտբոլը և ֆուտբոլիստները այսօր շատ երկրների այցեքարտն են աշխարհում: Շնորհիվ Դիդյե Դրոգբայի և էլի մի շարք ֆուտբոլիստների Եվրոպայում, ինչու չէ՝ նաև Հայաստանում շատերը տեղեկացան, որ գոյություն ունի Կոտ դ՝Իվուարի պես երկիր: Լեգենդար Ջորջ Վեայի շնորհիվ միլիոնավոր մարդիկ տեղեկացան Լիբերիայի մասին:
Մխիթարյանին ստացած պարգևի կապակցությամբ անմիջապես շնորհավորել է աշխարհի ամենաթանկ ֆուտբոլիստ, Եվրոպայի լավագույն կիսապաշտպաններից մեկը՝ Պոլ Պոգբան: Վերջինիս այս քայլը միայն բավական է, որպեսզի ողջ Եվրոպայի ֆուտբոլային հասարակությունը կրկին անգամ խոսի Մխիթարյանի և Հայաստանի մասին: Խոսի, որ աշխարհահռչակ հայ ֆուտբոլիստը գնահատված է նաև իր հայրենիքում:
Այն մարդիկ, ովքեր դժգոհում են, որ Մխիթարյանը Սերժ Սարգսյանի կողմից տրված մեդալը վերցրեց, նույն տրամաբանության համաձայն՝ պետք է դժգոհ լինեն, որ մեծագույն ֆուտբոլիստը խաղում է մի երկրի հավաքականում, որը գլխավորում է հանցավոր իշխանությունը: Ազգային հավաքականը և հավաքականում հանդես եկող ֆուտբոլիստները մեղավոր չեն, որ երկրի իշխանությունները վատն են: Ավելին, ցանկացած պարագայում ազգային հավաքականի ֆուտբոլիստները պետք է անեն ամեն ինչ երկրի պատիվը բարձր պահելու համար:
Ինչևէ, պաշտոնական արարողությունից հետո հարցին, թե ինչ է իրեն ասել նախագահը մեդալը հանձնելիս, Մխիթարյանը պատասխանել է, որ Սերժ Սարգսյանը շնորհակալություն է հայտնել Հայաստանն աշխարհում լավագույն կերպով ներկայացնելու համար և շնորհավորել է մեդալը ստանալու կապակցությամբ: Կարծում ենք՝ մեկնաբանություններն ավելորդ են:
Մխիթարյանն անդրադարձել է նաև Եվրոպայի լիգայի եզրափակիչ խաղից հետո Հայաստանի դրոշը խաղադաշտում բարձրացնելուն: Նա ընդգծել է, որ հայկական Եռագույնը բարձրացնելը յուրաքանչյուրի պարտականությունն է: «Ինձ համար միշտ պատիվ է տարբեր վայրերում բարձրացնել Հայաստանի դրոշը: Այդ գաղափարը ես վաղուց էի ցանկանում իրագործել, և ի վերջո ստացվեց, քանի որ մենք կարողացանք հաղթել Եվրոպայի լիգայում»,- նշել է Մխիթարյանը:
Նա երեկ այցելել է նաև Ծիծեռնակաբերդ և հարգանքի տուրք մատուցել Հայոց ցեղասպանության զոհերի հիշատակին: Մխիթարյանը առաջիկա օրերին Հայաստանի ազգային հավաքականի կազմում կսկսի նախապատրաստվել հունիսի 4-ին Երևանում կայանալիք Սենտ Քիթս և Նևիսի դեմ ընկերական և հունիսի 10-ին Պոդգորիցայում կայանալիք աշխարհի առաջնության ընտրական փուլի Մոնտենեգրո-Հայաստան հանդիպմանը: