Ոչ ոք չէր կասկածում, որ ՀՀ ԱԺ ընտրության գլխավոր տեխնոլոգիաներից մեկը լինելու էր ընտրակաշառքը: Նկատի ունենալով ՀՀ հասարակության սոցիալական ծանրագույն վիճակը, նաև քաղաքացիական գիտակցության, մեղմ ասած, ցածր մակարդակը, ինչպես նաև ընդդիմադիր դաշտի վարկանիշային ոչ այնքան լավ ժամանակահատվածը, կարող ենք եզրակացնել, որ այդ տեխնոլոգիան բավական արդյունավետ աշխատում է մինչ այս պահը։
Կարելի է մեղադրել հասարակությանը, ասել, որ այդ հասարակությունը չեկավ ու ձայն չտվեց ընդդիմությանը, ասել, որ հասարակությունը կաշառվեց, վախեցավ, ընկրկեց: Հայաստանում բոլոր տեսակի ընդդիմությունները իրենց անհաջողությունները մշտապես այդպես բարդել են հասարակության վրա, սպասել են, որ հասարակությունն անի իրենց գործը, իսկ իրենք վայելեն միայն դափնիները: Մինչդեռ հասարակությունն ամենից լավն է զգում, թե ինչ կանոններով է խաղը, և ըստ այդ զգացողության ու գիտակցումի էլ ընտրում է անտարբերությունը:
Այսօրվա ընտրության պատկերն իսկապես խայտառակ է, խայտառակ է թե՛ արտաքին դրսևորմամբ, թե՛ ներքին բովանդակությամբ: Բայց մի՞թե որևէ մեկը ավելին էր սպասում իշխանությունից: Մի՞թե որևէ մեկն ավելին էր սպասում՝ տեսնելով այն ցուցակներն ու թեկնածուներին, որոնց ներկայացրել էր իշխանությունը ընտրությունից առաջ: Մի՞թե որևէ մեկը հավատացել էր Սերժ Սարգսյանին ու ՀՀԿ-ին և սպասում էր, որ նա չպետք է կեղծի ընտրությունը: Մի՞թե որևէ մեկի համար պարզ չէր, որ Սերժ Սարգսյանը չի կարող ընտրվել կամ վերընտրվել առանց կեղծիքի: Մի՞թե պարզ չէր, որ Հայաստանում սպասվում են «ավանդական» ընտրություններ, որոնք հնարավոր էր կանխել միմիայն ոչ ավանդական մարտավարությամբ և վարքով: Բայց ընդդիմությունը հետևողականորեն գնաց այդ «ավանդականին» ընդառաջ: Ավելին, հարստացրեց այդ ավանդականը նոու-հաուներով՝ փնովել իշխանության մի մասին և դրա դեմ պայքարել՝ մյուս մասին վեր բարձրացնելով:
Այս իմաստով ապրիլի 2-ի ընտրությունները Հայաստանի պատմության մեջ կմտնեն ոչ թե կեղծիքներով, խայտառակ բնույթով, ինչը մեր երկրի համար ամենևին նորություն կամ անսպասելի բան չէ, այլ պատմության մեջ այս ընտրությունները կմտնեն երևի թե հենց այն աննախադեպ հանգամանքով, որ առաջին անգամ ընտրությունների կեղծման գործում, կամա թե ակամա, իշխանությանը լայն հնարավորություններ ընձեռել է ընդդիմությունը՝ իր քայլերով խորացնելով հանրային ապատիան, ինչը ընտրակեղծարար իշխանության համար ամենացանկալի պարագան է:
Լուսանկարը՝ Photolure-ի
