Վրացական GHN գործակալության փոխանցմամբ, Վրաստանի պաշտպանության նախկին նախարար Իրակլի Օքրուաշվիլին վրացական բանակին կոչ է արել անցնելու ժողովրդի կողմը.
«Մի քանի օր անց վրաց ժողովուրդը նախագահ Սաակաշվիլիից ու նրա իշխանություններից բաժանված կլինի բարիկադներով: Այդ ժամանակ ես կանգնած կլինեմ իմ ժողովրդի կողքին: Ես բոլորից լավ գիտեմ, թե ինչ են զգում զինվորականները և ողջ բանակը:
Ճակատագիրն ինձ թույլ է տվել երկու տարի գտնվել բանակի շարքերում: Վերջին տարիների ընթացքում վրաց զինվորականներն արժանիորեն չեն գնահատվել ո՛չ Շևարդնաձեի, ո՛չ էլ Սաակաշվիլիի իշխանությունների կողմից:
2008 թվականի օգոստոսյան պատերազմից հետո Սաակաշվիլին սկսեց հակակրանք տածել բանակի հանդեպ և մեր գլխին որպես դահիճ նշանակեց Ախալայային (պաշտպանության ներկայիս նախարար): Դրա միակ նպատակը մեզ վերահսկելն էր և երկրում տեղի ունեցող իրադարձությունների մասին ձեր ազատ արտահայտվելուն արգելք հանդիսանալը:
2008 թվականից հետո Սաակաշվիլին այն աստիճան ատեց ձեզ, որ սկսեց ձեզ օգտագործել միայն ռազմական շքերթների ժամանակ: Կամ էլ քիչ ավելին. նա գրոշների դիմաց սկսեց ձեզ էքսկուրսիաների ուղարկել Իրաք կամ Աֆղանստան, ինչի արդյունքում զոհվեցին ձեր ծառայակիցները:
Իշխանությունները բանակի հետ վարվում են այնպես, ինչպես Վրաստանի մնացած քաղաքացիների հետ: Հուսով եմ, որ վրաց զինվորականների ընտրությունը կփոխի պատմությունը, կջնջի ամոթը և կփրկի Վրաստանին: Դա տեղի կունենա այն դեպքում, եթե բանակը կանգնի ժողովրդի կողքին»:
Հիշեցնենք, որ Օքրուաշվիլին Վրաստանի պաշտպանության նախարար է եղել 17.12.2004-10.11.2006-ն ընկած ժամանակահատվածում:
Վրաստանում Օքրուաշվիլիին մեղադրում են ռուսական հատուկ ծառայությունների գործակալ լինելու մեջ: Իսկ ապրիլի վերջին Վրաստանի «Ազգային ժողով» կուսակցության ներկայացուցիչ Էլիզբար Ջավելիձեն Օքրուաշվիլիին մեղադրեց հայկական արմատներ ունենալու մեջ` ընդգծելով, որ նրա հոր ազգանունը Ոսկանյան է:
