Լիտվան շատ նրբազգաց և ուշադիր է ԵՄ-ի արևելյան 6 գործընկերների հանդեպ: Այս մասին այսօր հայտարարեց փոխարտգործնախարար Զոհրաբ Մնացականյանը՝ «Լիտվայի առաջիկա նախագահության շնորհանդես՝ Վիլնյուսի գագաթնաժողովին ընդառաջ Արևելյան գործընկերության գերակայությունները» խորագրով գիտաժողովի ժամանակ՝ կարևորելով ԵՄ-ում Լիտվայի նախագահությունը:
Մնացականյանի խոսքով՝ Լիտվայի հետ կապը Արևելյան գործընկերության շրջանակում առավել անմիջական է: «Մենք կարող ենք ուղղակի հեռախոսով ցանկացած պահի զանգահարել, փոխանակել մտքեր, տեղեկատվություն, ինչը շատ կարևոր է գործընթացի համար»,- ասաց Զ. Մնացականյանը:
Նա նշեց, որ իրենք շատ առիթներ են ունեցել և դեռ կունենան՝ ներկայացնելու, թե ինչ փոփոխություններ կբերի Ասոցացման համաձայնագիրը Հայաստանում: Այս տեսակետից, ըստ Մնացականյանի, շատ կարևոր է քաղաքացիական հասարակության և ակտիվ հասարակական կազմակերպությունների դերը: Այժմ, փոխարտգործնախարարի խոսքով, հասարակական քննարկումները մտնում են որակապես նոր փուլ՝ էապես ավելի խորը քննարկումներով:
«Երբեմն հարցնում են՝ ինչի՞ մասին է խոսքը, երբ ոչ ոք չի տեսել այդ պայմանագիրը: Ես ասեմ, որ ԵՄ-ն չի հասկանա, եթե մենք այժմ՝ բանակցությունները չավարտած, հրապարակենք պայմանագրի տեքստը»,- ասաց Զ. Մնացականյանը՝ հավելելով, որ Ուկրաինայի դեպքում այլ է. Ուկրաինան 2 տարի առաջ նախաստորագրել է Ասոցացման համաձայնագիրը, հիմա ստորագրման ու վավերացման փուլում է, այդ պատճառով էլ պայմանագրի տեքստը հրապարակային է:
Ըստ փոխարտգործնախարարի՝ Հայաստանը տեքստը կհրապարակի, երբ հայկական կողմը ԵՄ-ի հետ կպայմանավորվի դրա հնարավորության շուրջ: «Պայմանագիրը 1000-ից ավելի էջ է, որը դեռ անցնելու է տեխնիկական զտում, լեզվական ճշգրտումներ: Բացի այդ՝ մի փոքր բովանդակային աշխատանք էլ կա, ուստի եթե մենք այսօր ինչ-որ բաներ հրապարակենք, հնարավոր է՝ խեղաթյուրումներից չկարողանանք խուսափել: Նույնը վիզաների դյուրացման պայմանագրի դեպքում էր, որը հրապարակվեց միայն վերջնական տեսքից հետո»,- ասաց Զ. Մնացականյանը:
