Վրաստանի արտգործնախարար Մայա Փանջիկիձեն ուրբաթ օրը Բաթումում ելույթ է ունեցել «Վրաստանի՝ եվրոպական ուղին» միջազգային համաժողովի ընթացքում և պատմել է Եվրամիությանն ինտեգրվելու գործընթացի, ինչպես նաև այն առաջընթացի մասին, որին հասել է երկիրը՝ ԵՄ-ի հետ համագործակցության շրջանակներում:
Փանջիկիձեն ասել է, որ Վրաստանը զգալի առաջընթաց է արձանագրել «Արևելյան գործընկերության» նախաձեռնած ճանապարհային քարտեզի իմպլեմենտացիայի առումով, ինչն էլ հանգեցրել է Եվրամիության հետ հարաբերությունների կարևոր փուլին, իսկ Ասոցացման համաձայնագիրը հիմք կդնի այդ հարաբերությունների խորացմանն ու զարգացմանը:
Նրա խոսքերով, Վրաստանը նաև ձգտում է զգալի առաջընթացի հասնել արտոնագրային ռեժիմի լիբերալիզացման ծրագիրն իրականացնելու հարցում, և երկրի առաջկա նպատակն այդ ծրագրի օրենսդրական փուլի ավարտն է:
Եվրամիության հետ հարաբերությունների զարգացման հարցում նախարարը մի քանի հիմնական ուղղություն է նշել, այդ թվում՝ասոցացման օրակարգին նախապատրաստվելը, ԵՄ-ում ճգնաժամի հետ կապված օպերացիաներում Վրաստանի մասնակցության վերաբերյալ Եվրամիության հետ պայմանագրի մշակումը։ Կարևոր կլինի նաև ԵՄ ծրագրերին Վրաստանի մասնակցության համար համաձայնագրի ստորագրումը, ինչպես նաև Վրաստանի՝ ԵՄ Էներգամիություն մտնելու վերաբերյալ բանակցությունների սկիզբը:
Փանջիկիձեն ընդգծել է նաև ազատ առևտրի կարևորությունը, հաղորդում է Trend-ը:
