Մեր քաղաքական կրավորական կեցվածքը, մեր ինքնիշխանության անխնա մսխումը, դիվանագիտական դաշտի մեր թերացումներն են դեպքերի զարգացումը տարել շփման գիծ։ Այսօր Ժողովրդավարության ազգային պլատֆորմի հրավիրած «Պատերազմ և ընտրություններ. ժողովրդավարացման հեռանկարները Հայաստանում» խորագրով քննարկման ընթացքում հայտարարեց «Անալիտիկոն» հանդեսի գլխավոր խմբագիր Գեղամ Բաղդասարյանը։
Սերժ Սարգսյանի թիկունքը բանակցությունների սեղանի շուրջ ամուր դարձնելու համար համախմբումը Բաղդասարյանը ճիշտ չի համարում։ Նրա խոսքով՝ համախմբված ուժերով պետք է պարզենք, թե ինչու ստեղծվեց այսօրվա իրավիճակը, իսկ այն համախմբումը, որի մասին այսօր խոսում են, պատասխանատվությունից խուսափելու իդեալական պայմաններ է ստեղծում:
Հայ ազգային կոնգրես խմբակցության քարտուղար Արամ Մանուկյանն էլ հակադարձում է՝ Հայ ազգային կոնգրեսը շարունակում է ունենալ իշխանությունների վարած քաղաքականության հետ նույն մտահոգությունները, բայց իրավիճակն այլ բան է թելադրում, և իրենք չեն առաջարկում համախմբվել Սերժ Սարգսյանի շուրջը:
Հրապարակախոս Հրանտ Տեր-Աբրահամյանը կիսում է Արամ Մանուկյանի տեսակետը, սակայն մատնանշում է մի քանի կարևոր գործողություններ, որոնք Սերժ Սարգսյանը պետք է այս օրերին աներ, սակայն չի արել։ Նրա խոսքով՝ իրենք իրենց հասանելիքն արել են, հիմա հերթը Սերժ Սարգսյանինն է։
Նա միևնույն ժամանակ հույս է հայտնում, որ թեպետ մինչ այսօր իշխանությունների կողմից քայլ չի արվել, սակայն իրավիճակը ճնշող է և կստիպի քայլեր անել:
Բաղդասարյանը, սակայն, հակադարձում է՝ ասելով. ինչի շուրջ համախմբվել, ինքը նույնիսկ վստահություն չունի, թե կոնկրետ ինչի շուրջ են իշխանությունները բանակցելու, որ ինքն էլ համախմբվի և թիկունք հզորացնի։ Չկա սրա հանդեպ հասարակական վերահսկողություն:
