Կոտայքի մարզի Առինջ գյուղում անցյալ տարվա հուլիսի 12-ին կասկածելի հանգամանքներում մահացած Մարո Գուլոյանի ինքնասպանության վերաբերյալ գործը 2013 թվականի ապրիլի 22-ին կարճվել է՝ հանցակազմի բացակայության պատճառաբանությամբ: Սակայն տուժող կողմի իրավահաջորդի՝ Մարո Գուլոյանի (Թովմասյան) հոր շահերը պաշտպանող Կանանց ռեսուրսային կենտրոնի իրավաբան Լուսինե Մինասյանի պնդմամբ՝ գործում կան մի շարք կասկածելի հանգամանքներ, որոնք այդպես էլ չեն ճշտվել: Նման պայմաններում գործը կարճելու իրավունք չունեին: Նա այսօր լրագրողների հետ հանդիպմանն ասաց՝ ինքը չի հավատում, որ Մարոն ինքնասպան է եղել:
Լուսինե Մինասյանը նշեց, որ տուժողը ամուսնու՝ Գևորգի հետ անընդհատ վիճաբանության մեջ է եղել և նրա կողմից մշտապես ենթարկվել ֆիզիկական բռնության:
Տուժողի մահվան օրը հարուցվել է քրեական գործ, սակայն ըստ բանախոսի՝ դատաբժիշկը չի ֆիքսել Մարոյի մարմնի բոլոր վնասվածքները:
Նշենք, որ ինքնասպանության դեպքում պարանոցին մնում են պարանի խորը հետքեր, սակայն Մարոյի պարանոցի հատվածում որևէ արտահայտիչ հետք չի եղել: Չեն ֆիքսվել դեմքի, մատների և աջ ոտքի հատվածի կապտուկները, որոնք անզեն աչքով էլ երևում են, որ հասցված են կենդանության օրոք, կապտուկները կարմիր են, այսինքն՝ այդտեղ արյուն է հոսել: Պարանոցի շրջանում կա խորը վնասվածք: Դատաբժիշկը պնդել է, թե տուժողը բնազդաբար փորձել է ազատվել պարանից, վնասել է վիզը, սակայն վնասվածքը խորն է, կարմիր, իսկ Մարոյի եղունգները մահվան օրը կարճ կտրած են եղել:
Իրավաբան Լուսինե Մինասյանի պնդմամբ՝ Մարոյի մահվանից վեց ամիս անց կատարվել է արտաշիրիմում: Գերեզմանատան աշխատակիցները չեն օգնել, և Մարոյի եղբայրն անձամբ է հանել քրոջ դագաղը: Դիակի դատաբժշկական փորձաքննության ժամանակ երկրորդ դատական բժիշկը ֆիքսել է նույն վնասվածքները, ինչ առաջին դատաբժիշկը: Մեկնաբանել են, թե դիակի փտման պատճառով մնացած վնասվածքները չեն եղել:
Նշենք, որ առաջին դատաբժշկական փորձաքննության ժամանակ եզրակացության հետ որևէ լուսանկար չի դրվել՝ պատճառաբանությամբ, որ ժապավենը փչացել է, նկարները կանաչավուն են եղել: Եզրակացությունը հիմնված չէ գիտական գրականությամբ, չկան փաստեր:
Ինքնասպանության դիմող մարդկանց 90 տոկոսի ենթալեզվի ոսկրը կոտրվում է, որովհետև այն շատ նուրբ է: Մարոյի ենթալեզվի ոսկրը կոտրված չի եղել: Վկաները հակասական ցուցմունքներ են տվել, հատկապես տարբեր ժամեր են նշում դեպքի կատարման վերաբերյալ. «Վերցնում են միայն այն փաստերը, որոնք ձեռնտու են գործը փակելու համար՝ հաստատելով ինքնասպանության վարկածը»:
Չպարզված հանգամանքների թվում է նաև Մարոյի օրգանիզմում ալկոհոլի հայտնաբերումը:
Այժմ իրավաբանը գործի կարճման առթիվ բողոք է ներկայացրել Կոտայքի մարզի դատախազությանը, սակայն չի հավատում, որ բողոքը որևէ նշանակություն կունենա: Այնուամենայնիվ, Լուսինե Մինասյանը շեշտեց, որ մինչև վերջ պայքարելու են՝ գործում կասկածելի հանգամանքները պարզելու համար: Եթե տեղական մարմինները գործին ընթացք չտան, իրավաբանը կդիմի միջազգային ատյաններին. «Մարոյի ամուսին Գևորգը Աբովյանի քաղաքապետ Կարապետ Գուլոյանի ազգականն է, ես չեմ ուզում որակումներ տալ, սակայն գործին պատշաճ ընթացք չտալը կապված է նաև այս հանգամանքի հետ: Մենք չկարողացանք գործի քննությունը Կոտայքից Երևան տեղափոխել և այստեղ շարունակել: Մեր այդ դիմումից մեկ շաբաթ անց գործը կարճվեց: Այսինքն՝ Հայաստանում գործում է ոչ թե օրենքի ուժը, այլ հակառակը»:
Հավելենք, որ Մարո Գուլոյանը 20 տարեկան էր, ուներ 2 տարեկան երեխա և ինքնասպանության պահին հղի էր:
