Առողջապահության նախարարությունը Հարություն Քուշկյանը հանձնարարել է մանրամասն վերլուծել քաղաքային բնակավայրերում ընտանեկան բժշկի ինստիտուտը և Հայաստանում առկա պայմանները:
Պարզելու համար, թե Հայաստանի Հանրապետությունում քաղաքային ո՞ր վայրերում է ընտանեկան բժշկությունը կայացած, որտեղ ոչ և ինչ պատճառներով` զրուցեցինք Առողջապահության նախարարության առաջնային բուժօգնության բաժնի պետ Ռուզաննա Յուզբաշյանի հետ:
Ինչպես տեղեկացրել էինք, Համաշխարհային բանկի վարկային 1 և 2-րդ ծրագիրն ամբողջությամբ ուղղված էր գյուղական առողջապահության ոլորտի բարեփոխմանը: Իսկ ներկա պահին աշխատանքեր են տարվում քաղաքային ընտանեկան բժշկության ինստիտուտի կայացման ուղղությամբ: Մեր զրուցակցի խոսքով, քաղաքային վայրերում խնդիրը մի քիչ այլ է. «Քաղաքում մենք իրականում ունենք շատ մեծ թվով նեղ մասնագետներ` ոչ միայն պոլիկլինիկաներում, այլև հիվանդանոցներում: Հանրապետության կադրերի ռեսուրսների 60 տոկոսը կուտակված է Երևան քաղաքում: Մեկ փայլուն օրինակ` մենք ունենք ընտանեկան բժշկության կենտրոն Գյումրիում, որտեղ միայն ընտանեկան բժիշկներ են աշխատում և քաղաքի պոլիկլինիկաներից ավելի լավ են գործում»:
Ընտանեկան բժիշկը ինչո՞վ է տարբերվում հիվանդանոցի բժշկից: Ըստ Յուզբաշյանի` նրանով, որ կարող է ախտորոշել և բուժել հիվանդին` առանց նրան այս կամ այն հետազոտության ուղարկելու: Այսինքն` նա պետք է այդ բոլոր հնարավորություններն իր ձեռքի տակ ունենա: Իսկ սրա համար մեծ ներդրումներ են անհրաժեշտ:
«Նախարարին դեռևս Հայաստանի Հանրապետությունում առկա ընտանեկան բժշկի ինստիտուտի վիճակն է ներկայացվել: Ծրագիրը մշակման փուլում է, իսկ մասնագետները կոնկրետ պարտավորություններ ունեն այս ուղղությամբ առաջարկներ ներկայացնելու համար»,-ավելացրեց ԱՆ առաջնային բուժօգնության բաժնի պետը:
