Apple ընկերության գլխավոր տնօրեն Թիմ Կուկը հայտարարել է, որ ներկայումս անհատական համակարգիչների պահանջարկը նվազել է: Նա այդ կարծիքը հայտնել է The Telegraph-ին տված հարցազրույցում:
«Ես կարծում եմ, որ եթե դուք նայեք անհատական համակարգչին, ապա հարց կծագի՝ ինչո՞ւ պետք է ես այն գնեմ: Իսկապես, ճիշտ է, ձեր ինչի՞ն է այն պետք»,- հարցնում է Կուկը:
Նրա կարծիքով՝ անհատական համակարգիչներին և նոթբուքներին փոխարինելու են եկել հզոր պլանշետները, ինչպիսին է, օրինակ, iPad Pro-ն: Երբ մարդիկ սկսում են դրանից օգտվել, նրանք «հետևություն են անում, որ իրենց, բացի հեռախոսից, այլևս ոչինչ պետք չէ»:
Սմարթֆոնների մասին խոսելով, որոնք չափերով մոտենում են պլանշետներին, Կուկը նշել է. «Ես կարծում եմ՝ եթե դուք ունեք մեծ սմարթֆոն, հազիվ թե ձեզ անհրաժեշտ լինի iPad mini»: Նա խոստովանել է, որ ընկերության՝ մեկը մյուսին փոխարինող ապրանքների թողարկումը հանգեցնում է, նրա խոսքով՝ «մարդակերության»: Սակայն «առայժմ մենք «մարդակերներ» ենք ինքներս մեզ համար, ամեն ինչ նորմալ է»,- նշել է նա:
