Գյումրիում տեղի ունեցավ «Սիրո գործակից» նոր կատակերգության պրեմիերան, որին մասնակցում էին նաև ֆիլմի ստեղծագործական թիմի անդամները և գլխավոր դերակատարներից Գարիկ Պապոյանն ու Հայկ Մարությանը:
«Առաջին լրատվական»-ի հետ զրույցում Հայկ Մարությանը նշեց, որ ֆիլմն ունի մարզական ուղղվածություն, և հանդիսանում է մարզական ֆիլմի ու ռոմանտիկ կատակերգության խառնուրդ:
«Ընդլայնվել է և՛ ֆիլմի աշխարհագրությունը, և՛ դերասանական կազմը, և՛ բյուջեն: Երևանյան պրեմիերայից հետո մենք որոշեցինք, որ այն գալու է նաև Գյումրի, ապա շրջագայելու է ողջ Հայաստանով, ու հատկապես սահմանամերձ բնակավայրերով՝ հասնելով մինչև Չինարի: Ընդ որում՝ սահմանամերձ գյուղերի մեր հայրենակիցների համար դիտումները կլինեն բարեգործական հիմունքներով: Գյումրիի այսօրվա պրեմիերային էլ, մենք, հատուկ հրավիրեցինք սահմանափակ կարողություններով մարդկանց, որոնք ավելի քիչ հնարավորություն ունեն կինոթատրոններ գնալու: Ասեմ, որ չափազանց գոհ եմ: Իրականում երկու պրեմիերա է այս պահին ընթանում Գյումրիում՝ մեկը Դրամատիկական թատրոնում, մյուսը Հոկտեմբեր կինոթատրոնում: Եվ պատկերացրեք դահլիճը լեփ լեցուն է: Սա նշանակում է, որ ֆիլմն իրոք ստացված է»,- նշեց Հայկ Մարությանը:
«Առաջին լրատվական»-ի այն հարցին, թե նախորդ ֆիլմերում, ինչպես օրինակ՝ «Սուպեր մամա»-յում ստեղծված կերպարները ունեն արդյոք իրենց նախատիպերն իրական կյանքում, մեր իրականության մեջ, և պահպանվել է արդյոք սոցիալական սատիրայի ավանդույթն այս ֆիլմում, պարոն Մարությանը պատասխանեց. «Իհարկե, կան նմանատիպ կերպարներ, և իհարկե, պահպանվել է այդ ավանդույթն այս ֆիլմում ևս: Իհարկե, մի փոքր այդ կերպարներն ուռճացված են, ավելի կատակերգայնացված, սակայն պահպանվել են, ու նայելով ֆիլմը դուք կարող եք տեսնել ու ճանաչել վերջիններիս նախատիպերին մեր կյանքում, այսօրվա մեր իրականության մեջ»:
Ի դեպ, վերջում Հայկ Մարությանը հավելեց, որ ամենայն հավանականությամբ, իր շարունակությունը կունենա նաև «Սուպեր մամա» ֆիլմը, ու այս պահին, ընդամենը գաղափարների խմորում է տեղի ունենում, իսկ ավելի հստակ կասեն այն ժամանակ, երբ ֆիլմի սցենարային կմախքը պատրաստ լինի:
