Թուրքական Dünya Bülteni լրատվական կենտրոնի փոխանցմամբ՝ Սիրիայի քրդերի «Դեմոկրատական միություն» կուսակցության (PYD) առաջնորդ Սալիհ Մուսլիմը El Monitör-ի հետ զրույցում աջակցություն է հայտնել Սիրիայում Ռուսաստանի կողմից ավիահարվածներ հասցնելուն։
Մուսլիմը դրական է համարել, որ Ռուսաստանն ավիահարվածներ է հասցնում ԴԱԻՇ-ի դիրքերին, և հավելել է, որ Ռուսաստանը միաժամանակ թույլ չի տա Սիրիայում Թուրքիայի կողմից միջամտություն. «Ռուսաստանի հետ մեր հարաբերությունները շարունակվում են արդեն 3 տարի։ Մենք շարունակ այցեր ենք կատարում Մոսկվա։ Սակայն իշխող վարչակարգը չի կարող ո՛չ մնալ, ո՛չ էլ վերադարձ կատարել հին օրերին։
Մենք արդեն կանք, մենք ի վիճակի ենք մեզ պաշտպանել թե՛ իշխող վարչակարգից, թե՛ մյուսներից։ Սիրիայում իրավիճակի կարգավորման դեպքում պետք է երաշխիքներ տրվեն Սիրիայի քրդերին ու էթնիկ և կրոնական բոլոր փոքրամասնություններին։
Դա կարող է իրականացվել ՄԱԿ-ի հովանու ներքո։ Արդեն անհրաժեշտ է ճանաչել ժողովրդավարական ինքնավարությունը։ Եթե չլինի ճանաչում, ապա մենք կշարունակենք մեր պայքարը։ Սիրիայի խնդիրը չի լուծվի առանց քրդական հարցի կարգավորման։ Մենք պահանջներ ունենք, ստեղծած համակարգ ունենք»։
Մուսլիմը հայտարարել է, որ Սիրիայում Ռուսաստանի ռազմական գործողություններն ամբողջովին փոխում են Սիրիայի հանդեպ Թուրքիայի քաղաքականությունը, և որ Ռուսաստանը թույլ չի տա Սիրիայում Թուրքիայի միջամտություն։
Մուսլիմը նկատել է, որ եթե Թուրքիան ի սկզբանե լուրջ պայքար մղեր ԴԱԻՇ-ի դեմ, ապա այսօր ԴԱԻՇ-ը չէր գտնվի Թուրքիայի հետ սահմանին. «ԴԱԻՇ-ը այնտեղ քրդերին է ոչնչացնում, գաղթեցնում, գյուղերն է այրում։ Թուրքիան ինչո՞ւ ոչինչ չի ձեռնարկում այնտեղ, չի կասեցնում»։
