Համատիրությունները վերածվել են ընտրական մեխանիզմների: Ինչպես այսօր լրագրողների հետ հանդիպման ժամանակ հայտարարեց ԱԺ ՀՅԴ խմբակցության քարտուղար, ՀՅԴ ԳՄ փոխներկայացուցիչ Աղվան Վարդանյանը, մի շենք չի, որ համատիրություն է, մի քանի շենքեր, մեծ տարածքներ վերածվել են համատիրությունների, և դեռ ընտրությունները չսկսված՝ արդեն կանչում են գրասենյակներ, ցանկեր կազմում:
«Ասում են՝ հաջորդ ընտրությունները լինելու են ավելի լավը, բայց լինում են ավելի վատը: Թաղային հեղինակությունները շրջում են ու ասում՝ ՀՀԿ-ի ընտրություն չի, մեր ախպոր ընտրությունն է: Մարզպետները Երևանում շտաբներ են բացել ու քարոզչությունը դեռ չսկսած՝ գործունեություն են ծավալում»,- ասաց Ա. Վարդանյանը:
Ըստ բանախոսի՝ ՀՅԴ-ն ֆորմալ առումով 5.5% կուսակցություն է, բայց իրականում ՀՅԴ կշիռը շատ ավելին է, ու ՀՅԴ-ն աշխատելու է ամենժամյա ռեժիմով՝ քաղաքը արդյունավետ կառավարելու պարտավորությունը ստանձնելու համար:
Նրա բնորոշմամբ՝ ՀՅԴ-ն ունի պրոֆեսիոնալ թիմ՝ շատ մեծ հնարավորություններով: Իհարկե, իրենք ունեցել են շեղումներ, թերություններ, բայց հիմնական քաղաքական ուղուց չեն շեղվել ու փորձելու են քաղաքացուն հասանելի դարձնել ՀՅԴ իրական էությունը: Ա. Վարդանյանը կոչ արեց այս անգամ վստահել, հավատալ և քվեարկել ՀՅԴ օգտին՝ խոստանալով փոփոխություններ ոչ միայն Երևանում, այլև ողջ հանրապետությունում:
Ա. Վարդանյանի կարծիքով՝ գուցե լավ է, որ ընդդիմության միավորում չեղավ, այժմ ամեն մեկն իր առավելագույնը կանի, և ընտրություններից հետո հնարավոր է՝ միավորում լինի.
«Մեր նպատակը պետք է լինի ջարդել քաղաքական մենաշնորհը ՀՀ-ում»:
Ա. Վարդանյանի խոսքով՝ ՀՅԴ ցանկը ղեկավարում է ԳՄ ներկայացուցիչ Արմեն Ռուստամյանը, հաջորդ համարները երկու փոխներկայացուցիչներն են. «Սա մեր անձնական հեղինակությունն է, և ամեն ինչ անելու ենք հաղթանակի համար»:
Անդրադառնալով ՀՅԴ ցուցակին՝ թե ինչու ցանկում չկան այնպիսի ակտիվ դեմքեր, ինչպիսիք են՝ Արա Նռանյանը, Լիլիթ Գալստյանը, Ա. Վարդանյանը նշեց, որ Նռանյանը այլ ուղղությամբ է աշխատում, իսկ Լիլիթ Գալստյանը, որ «ակտիվ, լավ աղջիկ է», չցանկացավ ցուցակում լինել, բայց նրա հետ դեռ կաշխատեն:
ՀՅԴ պատգամավորը համամիտ է, որ Տարոն Մարգարյանը ժամանակին լավ թաղապետ է եղել, նա կարող է այս ընտրություններից հետո վերադառնալ և շարունակել համայնքը ղեկավարել: Ըստ նրա՝ ներկայում քաղաքապետարանի մեծ մասը ՀՀԿ-ական է, բայց նույն ՀՀԿ-ականները իրենք շատ լավ գիտակցում են երկրի իրական վիճակը:
