ԵՄ դիվանագիտական գերատեսչությունը հսկայական քանակությամբ թանկարժեք սպասքի գնման տենդեր է հայտարարել կազմակերպության բրյուսելյան շտաբ-բնակարանի և մեծաթիվ դիվանագիտական ներկայացուցչությունների համար: Համապատասխան փաստաթղթերը հայտնվել են The Telegrath-ի տրամադրության տակ:
Սպասքը ձեռք կբերվի եվրոպական դիվանագիտական գերատեսչության 3360 պաշտոնատար անձի և հյուրերի, նաև ամբողջ աշխարհում 140 դեսպանությունների համար: Մասնավորապես, ծրագրվում է ձեռք բերել սառույցի հարյուրավոր արծաթե ամաններ, հազարավոր բյուրեղապակե բաժակներ վիսկիի, կոնյակի և շամպայնի համար, արծաթե աշտանակներ և բարակ ճենապակի, որի վրա ոսկով փորագրված կլինի ԵՄ խորհրդանիշը: Սպասքը կարժենա 2 մլն եվրո:
Ամբողջ հավաքածուն 10 անգամ թանկ կլինի վերջերս ԱՄՆ Սպիտակ տան համար գնված սպասքից, նշում է պարբերականը: Տենդերը հրապարակվել է այս տարվա ապրիլի 23-ին, պոտենցիալ առևտուրը բացվել է երեքշաբթի:
Եվրախորհրդարանի անդամներին անհասկանալի են այդքան մեծ ծախսերը: «Եթե մեզ պետք է բոլորի աչքին թոզ փչել ԵՄ մեծությամբ, այդ ծառայությունը միանգամայն հարմար է, բայց դա պարզապես սարսափելի է»,- ասել է պահպանողականներից Եվրախորհրդարանի պատգամավոր, բրիտանացի Ջեֆրի Վան Օրդենը:
Նրա խոսքով՝ այդպիսի ծախսերն անթույլատրելի են այն ժամանակ, երբ ինքը՝ ԵՄ-ն Հունաստանից պահանջում է ձգել գոտիներն ու նվազեցնել ծախսերը:
