Ամբողջ աշխարհում կանայք շատ ավելի երկար են ապրում, քան տղամարդիկ: Դրա պատճառը ոչ թե վնասակար սովորույթներն ու ռիսկի հանդեպ տղամարդկանց հակվածությունն է, այլ սրտի կաթվածի ու սրտանոթային ճակատագրական հիվանդությունների հանդեպ նրանց հակվածությունը: Ria Novosti-ի փոխանցմամբ՝ գիտնականներն այս մասին նշել են Proceedings of the National Academy of Sciences ամսագրում հրապարակված հոդվածում:
Առողջապահության համաշխարհային կազմակերպության (ԱՀԿ) վիճակագրության համաձայն՝ ներկայում մարդու կյանքի միջին տևողությունը 71 տարի է:
Աշխարհի բոլոր երկրներում՝ սկսած Աֆրիկայի աղքատ երկրներից մինչև Եվրոպայի ամենահարուստ երկրներ, կանանց կյանքի տևողությունը կայուն կերպով մնում է ավելի բարձր, քան տղամարդկանցը՝ 73-ը 68-ի դիմաց: Ամերիկացի գիտնականները ստուգել են տարածում գտած այն կարծիքը, որ տղամարդիկ ավելի շատ են ծխում ու խմում և ավելի հակված են ռիսկի, քան կանայք, ինչը կրճատում է նրանց կյանքի միջին տևողությունը:
Գիտնականները հավաքել և վերլուծության են ենթարկել աշխարհի 13 զարգացած երկրներում մահացության դեպքերը՝ սկսած 19-րդ դարից, վերջացրած 20-րդ դարի երկրորդ կեսով, երբ բժշկությունը կտրուկ աճ արձանագրեց մարդու կյանքի տևողության հարցում:
Գիտնականները նախևառաջ պարզել են, որ մահացության հարցում սեռերի միջև տարբերությունը ժամանակակից երևույթ է, քանի որ մինչև 19-րդ դարի վերջին տասնամյակը այն պարզապես գոյություն չի ունեցել, և տղամարդկանց ու կանանց մահացությունը եղել է գրեթե հավասար:
Դրանից հետո կանանց մահացությունը սկսել է կտրուկ անկում ապրել, մինչդեռ տղամարդկանց շրջանում անկումը չի եղել այդքան արագ: 50-70 տարեկան տղամարդկանց շրջանում ավելի հաճախ են գրանցվել մահացության դեպքեր, քան կանանց մոտ: 20-րդ դարի վիճակագրությունը ցույց է տվել, որ տղամարդիկ ավելի հաճախ են մահանում սրտի ու անոթների խնդիրներից, ընդ որում՝ տարբերությունը մշտապես աճում է. նախորդ դարի 20-ական թվականներին այն 1.5 անգամից աճել է մինչև ներկայիս 3.5-ի:
