Մադրիդի «Ռեալ»-ի նորանշանակ գլխավոր մարզիչ Ռաֆա Բենիտեսն արդեն կազմել է թիմի տրանսֆերային ցուցակը:
Իսպանական AS-ի համաձայն` 55-ամյա մասնագետը մտադիր է «Ռեալ» վերադարձնել Թուրինի «Յուվենտուս»-ի իսպանացի հարձակվող Ալվարո Մորատային: 22-ամյա հարձակվողն Իտալիա էր տեղափոխվել 22 մլն եվրոյի դիմաց, իսկ այս տրանսֆերային պատուհանի ընթացքում մադրիդյան ակումբը կփորձի վերադարձնել նրա տրանսֆերը 30 մլն եվրոյով:
The Telegraph-ը հաղորդում է, որ Բենիտեսը ցանկանում է իր թիմում տեսնել նաև Լոնդոնի «Չելսի»-ի ֆուտբոլիստներ Էդեն Ազարին և Դիեգո Կոստային: Բելգիացի կիսապաշտպանը ճանաչվել էր Անգլիայի Պրեմիեր լիգայի 14/15 մրցաշրջանի լավագույն ֆուտբոլիստ, իսկ Կոստան ցանկանում էր վերադառնալ Իսպանիա:
Մադրիդյան ակումբի տրանսֆերային ցուցակում ընդգրկված է նաև անգլիական «Մանչեսթեր Յունայթեդ»-ի իսպանացի դարպասապահ Դավիդ Դե Խեան և Թուրինի «Յուվենտուս»-ի պաշտպան Լեոնարդո Բոնուչին, գրում է Goal.com-ը:
Բացի այդ, «արքայական ակումբ»-ը մտադիր է վարձավճարով այլ ակումբ ուղարկել 16-ամյա նորվեգացի կիսապաշտպան Մարտին Էդեգորին և 19-ամյա իսպանացի կիսապաշտպան Մարկո Ասենսիոյին:
