Գեղարքունիքի մարզի ընդհանուր իրավասության դատարանում Մնացական Հարությունյանի նախագահությամբ ընթանում է մարզի դպրոցներից մեկի ֆիզիկայի ուսուցչուհու գործի դատական քննությունը:
59-ամյա ուսուցչուհին մեղադրվում է 8-րդ դասարանի աշակերտի առողջությանը անզգուշությամբ ծանր վնաս հասցնելու համար՝ ՀՀ քրեական օրենսգրքի 120 հոդվածի 1-ին մասով:
Ըստ մեղադրանքի՝ 2014 թվականի դեկտեմբերի 9-ին, ժամը 11-ն անց 30-ի սահմաններում 8-րդ դասարանում ֆիզիկայի դասաժամի ավարտին ուսուցչուհին ծիծաղի ձայն է լսել:
Նա «շրջվել ու տեսել է, որ դասարանի տղաներից մեկը, առանց թույլտվություն հարցնելու, գնացել ու անցել է դասարանի վերջնամասի անկյունում տեղադրված կախիչի հետնամաս: Դասաժամը չընդհատելու համար ուսուցչուհին գրատախտակի մոտից, աշակերտական նստարանների միջնամասով, հետ-հետ քայլել է կախիչի ուղղությամբ…
Թաքնված աշակերտը կարծել է, թե ուսուցչուհին կարող է մոտենալ ու իրեն պատժել:
Նա լարված վիճակում սպասել է, թե ուսուցչուհին ո՞ր կողմից կմոտենա իրեն, որպեսզի ինքը հակառակ կողմից դուրս գա ու փախչի, ուսուցչուհին չկարողանա իրեն պատժել:
Այն պահին, երբ ուսուցչուհին հասել է կախիչի մոտ, աշակերտը կախիչը հրել է դեպի ուսուցչուհին, որպեսզի կարողանա փախչել: Նույն պահին ուսուցչուհին, տեսնելով, որ աշակերտների հագուստներով ծանրաբեռնված կախիչը գալիս է իր ուղղությամբ, թեև տվյալ իրադրության պայմաններում պարտավոր էր, կարող էր և հնարավորություն ուներ նախատեսել իր գործողության հետևանքով հանրորեն վտանգավոր հետևանքների առաջացման հնարավորությունը, չի նախատեսել դրանք, դրսևորել է հանցավոր անփութություն, կախիչը հետ է հրել իր սկզբնական դիրք:
Դրա հետևանքով հագուստների կախիչը հետ է շպրտվել, մետաղե ոտնակների վրա կանգնելու ընթացքում՝ կեռիկների հատվածում, ընկել է տատանումների մեջ, որի ժամանակ կախիչի հետնամասի մետաղե կեռիկներից մեկը դիպել է թաքնված 13-ամյա աշակերտի ձախ աչքին՝ նրա առողջությանն անզգուշությամբ պատճառելով ծանր վնաս՝ ձախ աչքի շրջանի ակնակապիճների հեմատոմայի, ձախ աչքի վերին կոպի աջ անկյան շրջանի սալջարդ վերքի, ձախ ակնագնդի ենթահոդախախտի՝ տեսաներվի լրիվ պոկման, դրսային ուղիղ և ստորին թեք մկանների պոկման ձևով, որն էլ հանգեցրել է երեխայի ձախ աչքի տեսողության լրիվ կորստի»:
Մեղադրանքի շարադրանքից մեջբերումը կատարված է ըստ դատական տեղեկատվական համակարգում տեղադրված տեղեկատվության…
