Shamshyan.com-ը տեղեկացնում է, որ այսօր՝ մայիսի 14-ին, ողբերգական դեպք է տեղի ունեցել Արագածոտնի մարզում: Ժամը 08:00-ի սահմաններում Ոստիկանության Աշտարակի բաժին ահազանգ է ստացվել, որ Սասունիկ գյուղով անցնող ջրատարում երիտասարդ տղայի դի կա:
Քիչ առաջ ՀՀ Տարածքային կառավարման և արտակարգ իրավիճակների նախարարության Փրկարար ծառայության Արագածոտնի մարզային փրկարար վարչության Աշտարակի հրշեջ փրկարարական ջոկատի աշխատակիցները հատուկ ճոպանի միջոցով կարողացան մեծ դժվարությամբ դուրս բերել 18-ամյա Հայկի դին:
Դեպքի վայր են ժամանել նաև Հայաստանի քննչական կոմիտեի Արագածոտնի մարզային քննչական վարչության մեծ թվով քննիչներ՝ վարչության պետ Մարատ Դուրյանի և տեղակալ Գագիկ Առաքելյանի գլխավորությամբ: Տեղում քնչական աշխատանքները ղեկավարում է ավագ քննիչ Արթուր Խլղաթյանը, ում կողմից փաստի առթիվ նյութեր են նախապատրաստվում:
Դեպքի վայրում հավաքվածներն ասում էին, մահացածը Սիսիան քաղաքի բնակիչ է և Սասունիկ գյուղ էր եկել՝ մասնակցելու իր ընկերոջ ծննդյան միջոցառմանը, իսկ երեկ գիշեր դուրս է եկել նշված վայրից և ոչ մի տեղեկություն այլևս չունեին նրա մասին:
Ոստիկաններն ու քննիչներն արդեն պարզել են, որ նա Երևանի Քանաքեռ-Զեյթուն վարչական շրջանի գազաբենզալցակայաններից մեկի աշխատակից էր:
Մանրամասները՝ սկզբնաղբյուր-կայքում
