1984-ի մայիսի 14-ին Նյու Յորքում ծնվել է «Facebook Inc.» ընկերության ղեկավար Մարկ Էլիոթ Ցուկերբերգը, որն արդեն 30 տարեկանում միլիարդատեր էր: Մարկը մեծացել է բժիշկների ընտանիքում, իսկ մանուկ հասակում նրան շրջապատել են 3 հարազատ քույրերը՝ գրում է Calend-ը:
Ծրագրավորմամբ նա տարվել է դեռևս տարրական դասարաններում՝ ինքնուրույն ստեղծելով նախ համակարգչային խաղ, ապա ծրագիր, որը ճանաչում էր երաժշտական ճաշակը և ունկնդիրների նախընտրությունները:
Հարվարդի համալսարանում ուսանելու տարիներին Ցուկերբերգը ստեղծեց կայք, որտեղ տեղադրեց Հարվարդի ուսանողների լուսանկարները: Մարդիկ հնարավորություն ունեին քվեարկել դուր եկած նկարի օգտին: Հաշված ժամերի ընթացքում կայքի այցելուների թիվը հասավ հարյուրավորների և սկսեց հայտնի դառնալ ոչ միայն Հարվարդի ուսանողների շրջանում։ Այդպես ստեղծվեց Facebook-ը, որը թողարկվեց 2004 թվականի փետրվարի 4-ին:
Մարկի նախագծի զարգացման համար գործարար Փիթեր Թիելսը Facebook-ում ներդրեց 500 հազար դոլար: Դրանից հետո Մարկը սկսեց զբաղվել բացառապես սոցցանցով, հանուն որի լքեց նաև համալսարանը:
Facebook-ի հաջողությունն ակնհայտ էր՝ ստեղծումից մեկ տարի անց այն արդեն ուներ 1 միլիոն օգտատեր: Կայքի միջոցով Ցուկերբերգը վաստակեց 1.5 միլիարդ դոլար, որը նրան դարձրեց ամենաերիտասարդ միլիարդատերը մարդկության ողջ պատմության ընթացքում։
