Apple ընկերության ղեկավար Սթիվ Ջոբսը հավանություն է տվել իր կենսագրության տպագրմանը: Գիրքը կկրի «iStive: The Book of Jobs» անվանումը, որը կտպագրվի 2012թ.-ին: Այս մասին հայտնում է Associated Press գործակալությունը` հղում կատարելով Simon & Schuster հրատարակչության ներկայացուցիչներին:
Գործակալության աղբյուրի փոխանցմամբ` Ջոբսի կենսագրության վերաբերյալ աշխատանքները տարվում են 2009թ.-ից: Միևնույն ժամանակ նրա հեղինակ Ուոլտեր Իսաակսոնը նախապատրաստական աշխատանքների ժամանակ արդեն խոսել է Ջոբսի, նրա ընտանիքի անդամների և Apple-ի իր կոլեգաների հետ:
Apple-ի ղեկավարի կենսագրության հեղինակը արդեն գրքեր է թողարկել Ալբերտ Էնշտեյնի, Բենջամին Ֆրանկլինի և Հենրի Քիսինջերի մասին: Բացի այդ, Իսաակսոնն աշխատել է CNN-ում և Time ամսագրի հրատարակչությունում:
«iStive: The Book of Jobs» գիրքը կդառնա Ջոբսի առաջին կենսագրականը, որին նա անձամբ հավանություն է տվել: Սթիվ Ջոբսի մասին գրքերը դրանից առաջ էլ են հրատարակվել, սակայն նրանք ոչ պաշտոնական են եղել: Այսպես, 2001թ.-ին լույս է տեսել Ալան Դոյչմանի «Սթիվ Ջոբսի երկրորդ հայտնությունը» գիրքը, իսկ 2005թ.-ին «iCon: Սթիվ Ջոբս» գիրքը:
