«Քաղաքական դաշտում ՀԱԿ-ի միակ մրցակիցը ՀՀԿ-ն է, մնացած ուժերը մտնելով ՀԱԿ-ի հետ պոլեմիկայի մեջ, նրան ինչ-որ մեղադրանքներ ներկայացնելով, իրենց PR կամպանիան են փորձում իրականացնել և փորձում են ՀԱԿ-ից ավելի հզոր երևալ, հասարակության գիտակցության մեջ հավասարվել ՀԱԿ-ին: Մի բան, որը ՀԱԿ-ը չպիտի թույլ տա»,- անդրադառնալով ՀԱԿ հանրահավաքից հետո «Ժառանգություն» կուսակցության քննադատական դիրքորոշմանը` կարծիք հայտնեց քաղտեխնոլոգ Արմեն Բադալյանը:
«Առաջին լրատվականի» հետ զրույցում Բադալյանը նկատեց, որ «Ժառանգությունը» ոչ թե քաղաքական ուժ է, այլ իրավապաշտպան կառույց, քանզի հենց նրանք են անընդհատ հայտարարում, թե կանգնած են բոլոր նրանց կողքին, ում իրավունքները ոտնահարված են. «Այդ ամենը դասական իրավապաշտպանի արտահայտություն է: ՀԱԿ-ը պետք է հասկանա, որ «Ժառանգությունն» իր մրցակիցը չէ, և «Ժառանգության» բոլոր հարցերին պատասխան պետք է տրվի միայն ՀԱԿ-ի մամլո քարտուղարի մակարդակով:
«Ժառանգության» հետ պոլեմիկայի մեջ մտնելը ՀԱԿ-ին օգուտ չի տա, «Ժառանգությանը»` միգուցե որևէ օգուտ տա»:
Բադալյանի խոսքերով, «Ժառանգությունը» մտածում է, որ եթե ՀԱԿ-ին մեղադրանքներ ներկայացնի, ապա ՀԱԿ-ի ընտրազանգվածը կհիասթափվի և կանցնի իր կողմը. «Կարող եմ ասել, որ «Ժառանգության» այս ստրատեգիան իրեն չի արդարացնի և սխալ է, որովհետև եթե անգամ ՀԱԿ-ի ընտրազանգվածը երես թեքի ՀԱԿ-ից, հաստատ «Ժառանգության» կողմը չի անցնելու, որովհետև այն չի ընկալվում որպես քաղաքական ուժ»:
Այդ ընտրազանգվածը, ըստ Բադալյանի, ՀՅԴ կողմն էլ չի գնալու:
