ԲՀԿ ութերորդ արտահերթ համագումարում կատարվեց Սերժ Սարգսյանի` փետրվարի 12-ի ՀՀԿ խորհրդի նիստում հնչեցրած հիմնական պահանջը՝ ԲՀԿ գործող նախագահ Գագիկ Ծառուկյանը հեռացավ քաղաքականությունից: Ծառուկյանը նույնիսկ խնդրեց իրեն քաղաքական խնդիրներով չանհանգստացնել` այդպիսով ընդգծելով քաղաքականությունից իր հեռանալու փաստը: Ծառուկյանն այլևս ԲՀԿ խմբակցության այնպիսի անդամ է, ինչպես Կարապետ Կարապետյանը կամ Հարություն Ղարագյոզյանը, ովքեր ակնհայտորեն քաղաքական գործիչներ չեն, բայց, համենայն դեպս, պահում են պատգամավորական մանդատը սեփական բիզնեսի և ապահովության համար:
ԲՀԿ նախագահ ընտրվեց Նաիրա Զոհրաբյանը, թեև, ինչպես նշել էինք, կային նախագահի առնվազն ևս երկու թեկնածուներ՝Վարդան Օսկանյանը և Աբրահամ Մանուկյանը: Ծառուկյանն ինքը հայտարարեց, որ նպատակահարմար է գտնում Նաիրա Զոհրաբյանի թեկնածությունը: ԲՀԿ-ականները համարում էին, որ Աբրահամ Մանուկյանը հրապարակային գործիչ չէ և չի կարող լինել կուսակցության քաղաքական դեմքը, իսկ Օսկանյանի դեպքում հնարավոր էր կուսակցության արտաքին քաղաքական ուղղվածության փոփոխություն, որը պետք չէր ո’չ ԲՀԿ-ին և ո’չ էլ իշխանություններին` ընդհանրապես:
Նաիրա Զոհրաբյանի ընտրությանը հետևել են դահլիճի բուռն ծափահարությունները:
Թեև Նաիրա Զոհրաբյանը ընտրվեց կուսակցության նախագահ և համատեղության կարգով քաղխորհրդի նախագահ, սակայն իրականում կուսակցությունում հաստատվել է երկիշխանություն և դերերի բաժանում: Համագումարից հետո տեղի ունեցած ճեպազրույցում Նաիրա Զոհրաբյանը հայտարարեց, որ առաջիկայում կուսակցության նախագահի և քաղխորհրդի նախագահի պաշտոնները տարանջատվելու են: Դա այս համագումարում չարվեց միայն նրա համար, որ կանոնադրական փոփոխություն պետք է իրականացվեր, իսկ այդ փոփոխության մասին, ըստ օրենքի, պետք է հայտարարվի մեկ ամիս առաջ. ԲՀԿ-ականները ժամանակ չունեին` մեկ ամիս սպասելու: ԲՀԿ-ն պատրաստվում է առաջիկա մեկ-երկու ամիսներին անցկացնել հերթական համագումար, որի ժամանակ էլ կիրականացվի այդ փոփոխությունը, և քաղխորհրդի նախագահի տեղակալ ընտրված Վարդան Վարդանյանը կդառնա քաղխորհրդի նախագահ: Նաիրա Զոհրաբյանը համագումարի ժամանակ էլ, ներկայացնելով Վարդան Վարդանյանին, ասել է, որ կուսակցականները նրան կարող են ընդունել դե յուրե քաղխորհրդի նախագահ: Զոհրաբյանը ասել է նաև, որ այս երկու պաշտոնների տարանջատումը կօգնի կուսակցությունում հավասարակշռություն ապահովել:
Այս տարանջատումը կօգնի նաև կուսակցության ներսում դերաբաժանում իրականացնել. Նաիրա Զոհրաբյանը կներկայացնի կուսակցության քաղաքական գիծը, իսկ Վարդան Վարդանյանը կզբաղվի կուսակցաշինությամբ և կազմակերպչական խնդիրներով, այդ թվում` կուսակցության տարածքային կառույցների աշխատանքի համակարգմամբ:
Մինչ համագումարը խոսվում էր այն մասին, որ Ծառուկյանի հեռանալուց հետո կուսակցությունը կլքեն քաղխորհրդի բազմաթիվ անդամներ, ովքեր սպասում են Ծառուկյանի հայտարարությանը: Ծառուկյանի հայտարարությունից հետո ԲՀԿ-ն մասսայականորեն լքելու դեպքեր չարձանագրվեցին, և հնարավոր է, որ այդպիսի բան առաջիկայում չլինի: Կուսակցության ոչ պատգամավոր, քաղխորհրդի անդամների մի մասը կհեռանա անձայն, առանց հրապարակային հայտարարությունների: Նրանց մեծ մասը համարում է, որ, Ծառուկյանի հեռանալով, ԲՀԿ-ն կորցնում է ամբողջական իշխանությունը վերցնելու հնարավորությունը, և իրենք չեն կարող լուրջ ակնկալիքներ ունենալ ԲՀԿ-ից:
Ինչ վերաբերում է պատգամավորական հատվածին, ապա քաղաքական թևի ներկայացուցիչները համոզված են, որ Նաիրա Զոհրաբյանը լավագույն ընտրությունն էր, և հասկանում են, որ ավելորդ ցնցումները վնասում են նաև իրենց հեղինակությանը:
Գործարար հատվածից կարող են լինել կուսակցությունից հեռացողներ, ովքեր վախենում են այն հեռանկարից, որ ԲՀԿ-ն պաշտոնապես կարող է հայտարարել ընդդիմություն դառնալու մասին: Սակայն նույն ՀՅԴ խմբակցության օրինակը ցույց է տալիս, որ թեև այդ խմբակցությունը հայտարարել է ընդդիմադիր լինելու մասին, բայց խմբակցության գործարար պատգամավորները ոչ միայն խնդիր չունեն իշխանության հետ, այլ, ընդհակառակը, խմբակցությունը ճանապարհ է` այդ խնդիրները հարթելու համար:
Կուսակցությունը նաև նոր կենտրոնական գրասենյակ ունենալու խնդիր ունի, քանի որ Ծառուկյանի հեռանալուց հետո ԲՀԿ-ն պետք է հեռանա նրան պատկանող կոնյակի գործարանից: Այս համագումարը վերջին միջոցառումն էր, որը կազմակերպվեց այդ տարածքում, և երեկ ԲՀԿ-ականները հրաժեշտ տվեցին ոչ միայն Ծառուկյանին, այլ նաև կուսակցության կենտրոնական գրասենյակին: Կուսակցության ներկայացուցիչները վստահեցնում են, որ առաջիկա 10 օրերի ընթացքում կլուծվի նաև այդ հարցը:
Ինչ վերաբերում է «Կենտրոն» հեռուստաընկերությանը, քաղաքականությունից դուրս գալուց հետո Ծառուկյանը մտադիր է հրաժարվել նաև այս հեռուստաընկերությունից և այս պահին հեռուստաընկերության նոր սեփականատիրոջ փնտրտուքների մեջ է: Ի տարբերություն ընդդիմադիր ՀՅԴ-ի և ՕԵԿ-ի, որոնք ունեն սեփական հեռուստաընկերություն, ԲՀԿ-ն ստիպված կլինի քարոզչական դաշտում բավարարվել կայքերով:
