Ազգային ժողովի նիստերի դահլիճին կից սրահում փետրվարի 23¬-ին բացվել է ժամանակակից նկարիչների ստեղծագործությունների ցուցահանդես: «Անտիկյան» ցուցասրահը ներկայացրել է 25 արվեստագետների՝ Լևոն Ազատյանի, Սամվել Չիբուխչյանի, Թենի Վարդանյանի, Սարգիս Համալբաշյանի, Նորա Բադալյանի, Արևիկ Արևշատյանի, Լավինիա Բաժբեուկ-Մելիքյանի, Սերյոժա Վարդանյանի և այլոց կտավներ: Ցուցահանդեսը, սակայն, պատգամավորների շրջանում մեծ հետաքրքրություն չի առաջացրել:
Այսօր, սակայն, արձանագրվեց հետաքրքիր դեպք. վաճառվեց մի կտավ: Գնորդը ԱԺ ՀՀԿ խմբակցության պատգամավոր Սամվել Ալեքսանյանն է, ով կտավը գնել է ԱԺ ՀԱԿ խմբակցության պատգամավոր Լյուդմիլա Սարգսյանի համար` Մարտի 8-ի առթիվ:
Լյուդմիլա Սարգսյանից «Առաջին լրատվական»-ը հետաքրքվեց, թե ո՞րն էր ընդդիմադիր պատգամավորին այս մեծ նվերը մատուցելու շարժառիթը: Լյուդմիլա Սարգսյանը պատմեց, որ նախորդ շաբաթ` ԱԺ նիստներից մեկի ժամանակ, ԱԺ ՀՀԿ խմբակցության պատգամավոր Սամվել Ֆարմանյանը հրավիրել է իրեն` դիտելու ցուցահանդեսը: «Ասացի՝ ասենք նայեցի, հետո ի՞նչ, ասաց` մենք կկազմակերպենք, Ձեզ համար նվեր կառնենք: Իսկ ես ասացի` մեծ-մեծ մի’ խոսիր և ինձ հետ խոսելիս զգույշ եղիր, քանի որ ինչ-որ ասում ես, ես հետո պահանջատեր եմ: Նա էլ ասաց, որ կզանգի Գագիկ Ծառուկյանին` Ձեզ համար կառնի: Ես հասկացա՝ ինչու է այդպես ասում: Ընդ որում՝ չգիտեմ` ում դեպքում ինչպես, բայց իմ դեպքում անհիմն է: Ես էլ ասացի՝ գիտես ինչ, ինձ համար մեկ է՝ Ծառուկյանին կզանգես, Սաշիկին, թե` Սերժ Սարգսյանին, ես քեզնից եմ պահանջելու, քանի որ դու քեզ թույլ ես տվել նման կարգի կատակ: Եվ ասացի՝ քեզ երկու օր ժամանակ: Ես հասկացա, որ ուզում է ինձ մանդրաժ գցել, ես էլ ուզեցի իրեն հասկացնել, որ ինձ հետ խոսելուց զգույշ լինի: Հետո երևի գնացել, գցել-բռնել է, որ ինքը քաշվելու է, ամեն անգամ պետք է ասեմ, որ այդպես մեծախոս եք, ինչպես ձեր նախընտրական խոստումներն են, այնպես էլ այսպես մեծ-մեծ խոսում եք, ինքն էլ իրեն թույլ տվեց ասել, որ կկազմակերպենք, Գալուստ Գրիգորիչը ԱԺ նիստի ժամանակ հրապարակավ կնվիրի, ես էլ ասացի՝ եթե քեզ թվում է` ես մանդրաժ կընկնեմ, չարաչար սխալվում ես, ասացի` ես էլ կասեմ` այո, այդքան թալանել եք, հիմա էլ ժողովրդին փոխհատուցեք թեկուզ մի փոքրիկ մասով»,- պատմեց Լյուդմիլա Սարգսյանը:
Այսօր Սամվել Ֆարմանյանը դուրս է կանչել Լյուդմիլա Սարգսյանին նիստերի դահլիճից, մոտեցրել ցուցասրահին և ասել, որ ինքն իր խոսքի տերն է, ապա հավելել է. «Սամվել Ալեքսանյանը Ձեզ մարտի 8-ի առթիվ նվեր է առնում` իմ խոսքի համաձայն»:
«Ակնկալում եմ, որ նրանք այսուհետ իրենց խոստումներում զգույշ կլինեն, և եթե խոստանում են, բարի թող լինեն կատարել: Իմ սենյակի ինտերիերի հետ շատ սազում է նկարը, կկախեմ իմ սենյակում»,- ասաց Լյուդմիլա Սարգսյանը:
