Մեծ Բրիտանիայի արտգործնախարարությունը հրապարակել է «Մարդու իրավունքներ և ժողովրդավարություն» 2010 թվականի զեկույցը, որում հիշատակվում է նաև Հայաստանը:
Զեկույցում մասնավորապես նշվում է, որ ԵՄ-ն ևս մեկ անգամ Հայաստանի ուշադրությունը հրավիրում է մարդու իրավունքների կարևորությանը՝ որպես լիովին ժողովրդավարական հասարակություն ստեղծելու հիմնական տարր:
Հղում է արվում ԵԱՀԿ մամուլի ազատության հարցերով ներկայացուցչի զեկույցին, ըստ որի՝ ՀՀ Հեռուստատեսության և ռադիոյի մասին օրենքի փոփոխությունները բավարար չեն ԶԼՄ-ների բազմակարծությունը ապահովելու համար, և ԵՄ-ն Հայաստանի կառավարությանն ու օրենսդիրներին կոչ է անում շարունակել սերտ համագործակցությունը քաղաքացիական հասարակության, Եվրոպայի և ԵԱՀԿ փորձագետների հետ, որպեսզի օրենքը նպաստի մամուլի ազատությանը և համապատասխանի եվրոպական չափանիշներին:
Անդրադարձ է կատարվում նաև ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) զեկույցին, որում նշում են Հայաստանի արդարադատության համակարգի թերացումները, որոնք ի հայտ են եկել 2008-ի մարտի հետընտրական բռնությունների դատական լսումների ժամանակ: Խորհուրդ է տրվում հաշվի առնել ԺՀՄԻԳ զեկույցը դատաիրավական համակարգի բարեփոխումներն իրականացնելիս:
ՄԹ արտգործնախարարության զեկույցում նշվում է, որ տնտեսական և քաղաքական կյանքում հայ կանանց նկատմամբ շարունակվում է խտրական մոտեցումը, մտահոգություն է արտահայտված նաև Հայաստանում ընտանեկան բռնության դեպքերի առնչությամբ:
Նյութը տրամադրել է Հայաստանում Մեծ Բրիտանիայի դեսպանատունը: Զեկույցին կարող եք ծանոթանալ http://fcohrdreport.readandcomment.com/ հասցեով:
