Վրաստանի նոր իշխանությունները «գաղտնի ազատ արձակեցին Վրաստանի պետականության դեմ պայքարի խորհրդանիշին»։ Այդ մասին հայտարարել է Վրաստանի նախկին վարչապետ և ներքին գործերի նախարար, երկրի նախագահ Միխեիլ Սաակաշվիլիի «Միացյալ ազգային շարժում» կուսակցության գլխավոր քարտուղար Վանո Մերաբիշվիլին` մեկնաբանելով ջավախահայ գործիչ Վահագն Չախալյանի ազատ արձակումը։
Չախալյանը, Մերաբիշվիլիի խոսքերով, Ջավախքում հայկական անջատողականության գաղափարախոսն էր։
«Չախալյանը Ջավախեթիում Վրաստանի պետականության գլխավոր թշնամին է», -«Ազատություն» ռադիոկայանը՝ հղում անելով «Գրուզիա օնլայն» ինտերնետային պարբերականին հաղորդում է, որ այդ մասին հայտարարել է Վրաստանի նախկին վարչապետը` պնդելով, թե ջավախահայ գործիչը «2003 – 2008 թվականներին պայքարել է Վրաստանի ուժեղացման, ռուսական զորքերի դուրսբերման, Ջավախեթիի սոցիալական, քաղաքական և տնտեսական ինտեգրման դեմ, եղել է ռուսաստանյան ռազմական հետախուզության անթաքույց էմիսար»։
Վահագն Չախալյանը կալանավայրից ազատ է արձակվել երեկ` 2012 թվականի դեկտեմբերին Վրաստանի խորհրդարանի կողմից ընդունված համաներման մասին օրենքի համաձայն: Նա 2009 թվականին դատապարտվել էր 10 տարվա ազատազրկման` «զենք ու զինամթերք ձեռք բերելու և պահելու», «հանրային կարգը խախտող միջոցառումներ կազմակերպելու», «ոստիկանին ցույց տված խմբակային դիմադրության և խուլիգանության» մեղադրանքներով։
