Սիրիայի իշխանությունները երկրից հեռացած քաղաքացիներին կոչ են արել վերադառնալ հայրենիք: Ինչպես հաղորդում է RIA Novosti-ն՝ վկայակոչելով Սիրիայի ՆԳՆ հաղորդագրությունը, իշխանությունները խոստացել են ձևակերպել երկրից անօրինական կերպով մեկնած քաղաքացիների մուտքի փաստաթղթերը:
«Սիրիայի բոլոր քաղաքացիներին, որոնք օրինական կամ անօրինական կերպով հեռացել են երկրից տեղի ունեցող իրադարձությունների պատճառով, վերադարձի համար կտրամադրվի համակողմանի օգնություն»,- հաղորդել է նախարարությունը:
ՆԳՆ հայտարարության մեջ նշվում էր , որ առանց փաստաթղերի ձևակերպման Սիրիայից հեռացած քաղաքացիներին (այդ թվում՝ ընդդիմության ներկայացուցիչներին) օգնության տրամադրումն իրականացվում է երկրի ղեկավարության քաղաքական ծրագրի շրջանակներում, որի նպատակն է երկիրը հանել ճգնաժամից:
Փախստականները և արտասահմանում թաքնվող ընդդիմադիրները կարող են Սիրիա վերադառնալ երկրի ցանկացած օդանավակայանի սահմանային կետով կամ Լիբանանի, Հորդանանի, Թուրքիայի և Իրաքի սահմանով:
Նշենք, որ ՄԱԿ տվյալների համաձայն՝ սիրիացի փախստականների թիվը կազմում է շուրջ 650 հազար:
