Իսպանական լրատվամիջոցների տեղեկությունների համաձայն` «Սևիլյա»-ի գլխավոր մարզիչ Ունաի Էմերին գոհ է մնացել իր սաների ցուցադրած խաղից` Իսպանիայի գավաթի խաղարկության քառորդ եզրափակչի շրջանակներում կայացած «Սարագոսա»-ի դեմ պատասխան հանդիպմանը: Թիմը 4 անպատասխան գնդակ է ուղարկել մրցակցի դարպասն ու անցել մրցաշարի կիսաեզրափակիչ:
«Այս խաղը կարելի է տարբեր հատվածների բաժանել` 11-ը` 11-ի, 11-ը` 10-ի և 11-ը` 9-ի դեմ: Իսկ մենք ավելի ու ավելի լավ էինք խաղում: Կիսաեզրափակչում մեր մրցակիցների մասին կասեմ, որ մեզ համար միևնույն է, թե ում հետ ենք խաղալու:
Գովելի է արդեն այն փաստը, որ մենք հաջորդ փուլ ենք անցել: Նշեմ, որ Մադրիդի «Ատլետիկո»-ն ու «Բետիս»-ը շատ բարդ մրցակիցներ են, և այդ թիմերից յուրաքանչյուրի հետ խաղալը մեզ համար հեշտ չի լինի: «Սևիլյա»-ն պարզապես պետք է օգտագործի յուրաքանչյուր շանսը»,- հայտնել է մասնագետը:
