Այսօր Անոնիմուսների օրն է. այդ օրը Գայ Ֆոքսի դիմակներով աշխարհի տարբեր քաղաքներում երթեր և ցույցեր են կազմակերպում` պահանջելով ավելի արդար կառավարում, ավելի արդար իշխանություն: Անցյալ տարի Անոնիմուսների օրը նշվեց նաև Երևանի կենտրոնում, Գայ Ֆոքսի դիմակ հագած մարդիկ երթ սկսեցին Երևանում. նրանց առաջնորդում էր Շանթ Հարությունյանը: Վերջինս հետևեց Գայ Ֆոքսի օրինակին, ով Անգլիայի խորհրդարանի շենքը պայթեցնելու միջոցով ցանկանում էր սպանել Հակոբ 1-ին և փոխել Անգլիայի իշխանությունը:
Հիշեցնենք, որ «Ազգային միացյալ նախաձեռնության» ղեկավար Շանթ Հարությունյանը 2013թ. նոյեմբերի 5-ին իր մոտ հարյուր աջակիցների հետ Գայ Ֆոքսի դիմակներով «Անոնիմուսների երթ» էր սկսել Ազատության հրապարակից։ Ոստիկանները Մաշտոցի պողոտայում կասեցրել էին երթը, տեղի էին ունեցել բախումներ, հնչել էին պայթյուններ արդյունքում ոստիկանները բերման էին ենթարկել 38 ակտիվիստների։ Բախումների հետևանքով տուժել էր 16 մարդ, այդ թվում ութ ոստիկան:
Շանթ Հարությունյանն ու նրա ընկերները այսօր կալանավորված են, իսկ նրա աջակիցները, քաղաքացիական ակտիվիստները որոշել են հիշել և իրենց պահանջատիրությունը ներկայացնել 2013թ. նոյեմբերի 5-ի Երևանի կենտրոնի իրադարձություններից մեկ տարի անց:
