Համազգային ՀԿՄՄ նախագահ Լիլիթ Գալստյանը, խոսելով Անկախության 23-րդ տարեդարձից, թե ինչ տվեց մեզ անկախությունը, նշեց, որ ինքնին անկախությունը անքննելի արժեք է, 600-ամյա երազանք: Անկախության ամենամեծ նվաճումը, նրա խոսքով, այնուամենայնիվ, Արցախյան ազատամարտն է և այդ ազատագրված հողի արժանապատվությունը, որը մեր պատմության մեջ վաղուց արձանագրում չուներ: «Մենք մի տեսակ մեր անկախությանը լավ տեր չկանգնեցինք, և մեր անկախությունը մի տեսակ լուծ դարձավ: Ես շատ կուզենայի, որ այս հաղթանակի մեջ ամենամեծ արժեքը հայը լիներ, Հայաստանի Հանրապետության քաղաքացին: Այդ իմաստով կարծում եմ, որ ձեռքբերումները շատ մեծ չեն: Մանավանդ, որ այս նոսրացող Հայաստանը, նկատի ունեմ արտագաղթը, չպաշտպանված իրավունքները, նկատի ունեմ քաղաքական մշակույթը, ինչի մեջ ապրում ենք, այս ամենի մեջ լռելը դավաճանություն է: Բայց ես իրավունք չունեմ լավատես չլինել»,- նշեց նա:
Շնորհավորելով մեր հայրենակիցներին Անկախության տոնի առթիվ՝ նա մաղթեց, որ մենք իսկապես ունենանք մեր հայրենիքը, գիտակցենք մեր միասնականության ուժը և կարողանանք համազգային օրակարգերի շուրջ համախմբվածության և սիրո դաշտ ձևավորել հանուն Հայաստանի:
